პოლიციამ თბილისში ოჯახის წევრის განზრახ, შეკვეთით მკვლელობის მომზადების ფაქტზე ერთი პირი დააკავა.

გამოძიების თანახმად, 1997 წელს დაბადებული ა.ს.-მ ანგარების მოტივით განიზრახა საკუთარი ბებიის — 1951 წელს დაბადებული ვ.ს.-ის შეკვეთით მკვლელობა. მას ამ მიზნით დაქირავებული მკვლელისთვის უნდა გადაეხადა 150 000 აშშ დოლარი. ა.ს.-მ პირს, რომელსაც უნდა შეესრულებინა მისი ბებიის მკვლელობა, დაუსახელა მსხვერპლის სახელი, ასაკი, საცხოვრებელი მისამართი და ინტერნეტაპლიკაციის მეშვეობით გაუგზავნა ბებიის ფოტოსურათი.

შინაგან საქმეთა სამინისტროს ინფორმაციით, ბრალდებულმა დანაშაულის მომზადებისთვის წინასწარ გადასცა გარკვეული თანხა, ხოლო შეკვეთის შესრულების შემდგომ დაჰპირდა დარჩენილი თანხის გადახდას. დანაშაულის სისრულეში მოყვანა ვერ შეძლეს, ა.ს. დაკავებულია.

გამოძიება სისხლის სამართლის კოდექსის 18-109-ე მუხლის „კ“ და „ნ“ ქვეპუნქტებით მიმდინარეობს, რაც ოჯახის წევრის მიმართ ანგარებით, შეკვეთით განზრახ მკვლელობის მომზადებას გულისხმობს. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.