უკრაინის პრეზიდენტის აპარატის უფროსის მოადგილე კირილო ტიმოშენკო აცხადებს, რომ ვერტმფრენი, რომლის ჩამოვარდნის შედეგადაც უკრაინის შინაგან საქმეთა მინისტრი და კიდევ 17 ადამიანი დაიღუპა, უკრაინის ერთ-ერთ ცხელ წერტილში მიფრინავდა.
“საქმეზე მიფრინავდა, ერთ-ერთ წერტილში… შეიძლება ითქვას, ცხელ წერტილში, რომელიც ჩვენს ქვეყანაშია, სადაც საომარი მოქმედებები მიმდინარეობს. იქ მიფრინავდა შინაგან საქმეთა მინისტრი”, – განაცხადა ტიმოშენკომ.
დღეს, 18 იანვარს, უკრაინის ქალაქ ბროვარში ჩამოვარდა ვერტმფრენი, რის შედეგადაც ბოლო მონაცემებით დაიღუპა 18 ადამიანი, მათ შორის- უკრაინის შს მინისტრი დენის მონასტირსკი, მისი პირველი მოადგილე ევგენი იენინი და სამინისტროს სახელმწიფო მდივანი იური ლუბკოვიჩი. ეროვნული პოლიციის უფროსმა იგორ კლიმენკომ ავიაკატასტროფის შემდეგ განაცხადა, რომ ბორტზე 9 ადამიანი იმყოფებოდა. მოგვიანებით კი უკრაინის პრეზიდენტმა, ვოლოდიმირ ზელენსკიმ განაცხადა, რომ ვერტმფრენი საბავშვო ბაღს დაეცა.
ბოლო მონაცემებით, დაიღუპა 18 ადამიანი, მათ შორის- 3 ბავშვი. უკრაინული მედიის ინფორმაციით, დაშავებულია 29 ადამიანი, მათ შორის -15 ბავშვი.
გარეკანის ფოტო: Reuters