სახალხო დამცველის ყოფილი მოადგილე სოფო ხორგუანი ცაგერის მერის გადადგომის შესახებ იუწყება.
ხორგუანის ინფორმაციით, გიორგი ნემსაძემ გადადგომაზე განცხადება დაწერა.
„მერის ვადამდელი არჩევნები ცაგერში გაზაფხულზე გვიწევს, თუ დღის ბოლომდე უკან არ დააბრუნეს“, — წერს ხორგუანი.
„ნეტგაზეთი“ დაუკავშირდა გიორგი ნემსაძეს. ის გადადგომის შესახებ ინფორმაციას არც უარყოფს და არც ადასტურებს.
„რაღაცას ველოდები, ჯერ ვერაფერს გეტყვით“, — განუცხადა ნემსაძემ ნეტგაზეთს.
ყოფილი ფეხბურთელი გიორგი ნემსაძე 2006-2014 წლებში იყო თბილისის საკრებულოს წევრი. იგი საკრებულოს დეპუტატი გახდა „ნაციონალური მოძრაობის“ სიით, თუმცა 2012 წლის ოქტომბერში, საპარლამენტო არჩევნებში „ქართული ოცნების“ გამარჯვების შემდეგ, ენმ დატოვა. 2013-2014 წლებში იყო თბილისის საკრებულოს ფრაქცია „ქართული ოცნება თბილისის“ თავმჯდომარე.
გიორგი ნემსაძე ცაგერის მერის პოსტს 2021 წლის ადგილობრივი თვითმმართველობის არჩევნების შემდეგ იკავებს.