შიდა ქართლსა და მცხეთა-მთიანეთში სახელმწიფოს კუთვნილი მიწების თაღლითურად დაუფლების ფაქტზე მცხეთის მერის ყოფილ წარმომადგენელს და მის მამას პროკურატურამ ბრალი წარუდგინა. ინფორმაციას ამის შესახებ გენერალური პროკურატურა ავრცელებს.

პროკურატურის ინფორმაციით, 2020 წელს მცხეთის მერის ყოფილმა წარმომადგენელმა ყალბი ოფიციალური დოკუმენტი შეადგინა, რის შედეგადაც მისი მამა თაღლითურად დაეუფლა 500 000 ლარად ღირებულ უძრავ ქონებას საგურამოში:

“ჩატარებული გამოძიებით დადგინდა, რომ მცხეთის მერის წარმომადგენელმა, რომელიც საგურამოს ადმინისტრაციულ ერთეულში 2019-2021 წლებში მუშაობდა, 2020 წელს შეადგინა ყალბი ოფიციალური დოკუმენტი, რომლის მიხედვითაც თითქოსდა მამამისზე გაცემული იყო საგურამოში მდებარე 3000 კვ.მ მიწის ნაკვეთი. აღნიშნული ყალბი დოკუმენტის საფუძველზე, მცხეთის მერის წარმომადგენლის მამა 500 000 ლარად ღირებულ უძრავ ქონებას თაღლითურად დაეუფლა”, — ნათქვამია პროკურატურის განცხადებაში.

უწყების ცნობით, მამა-შვილს ბრალი წარუდგინეს სამსახურებრივი სიყალბის, თაღლითობის, თაღლითობაში დახმარების და ყალბი ოფიციალური დოკუმენტის დამზადება-გამოყენების ფაქტზე. პროკურატურის ინფორმაციით, ორივე ბრალდებულმა ითანამშრომლა გამოძიებასთან და დანაშაული აღიარა.

პროკურატურის ცნობით, მცხეთის მერის ყოფილ წარმომადგენელს ბრალდება წარედგინათ სსკ-ის 341-ე მუხლით (სამსახურებრივი სიყალბე, ესე იგი მოხელესთან გათანაბრებული პირის მიერ ყალბი დოკუმენტის შედგენა და გაცემა, ჩადენილი პირადი მოტივით) და სსკ-ის 25,180-ე მუხლის მე-3 ნაწილის „ბ“ ქვეპუნქტით (თაღლითობაში დახმარება, ესე იგი მართლსაწინააღმდეგო მისაკუთრების მიზნით სხვისი ნივთის მოტყუებით დაუფლებაში დახმარება, ჩადენილი დიდი ოდენობით), ხოლო მის მამას სსკ-ის 180-ე მუხლის მე-3 ნაწილის „ბ“ ქვეპუნქტით (თაღლითობა, ესე იგი მართლსაწინააღმდეგო მისაკუთრების მიზნით სხვისი ნივთის მოტყუებით დაუფლება, ჩადენილი დიდი ოდენობით) და სსკ-ის 362-ე მუხლის მე-2 ნაწილის „ბ“ ქვეპუნქტით (ყალბი ოფიციალური დოკუმენტის დამზადება გამოყენების მიზნით და გამოყენება, რამაც მნიშვნელოვანი ზიანი გამოიწვია).

პროკურატურა განმარტავს, რომ შიდა ქართლისა და მცხეთა მთიანეთის რეგიონში სახელმწიფოს კუთვნილი მიწების თაღლითურად დაუფლების ფაქტებზე მსჯავრდებულია 83 პირი, მათ შორის, 6 საჯარო მოხელე. უწყების ინფორმაციით, სახელმწიფოს 5 033 000 ლარის ღირებულების უძრავი ქონება დაუბრუნდა.