ახალი ამბები

დედის მკვლელობაში ბრალდებულსა და მის მეგობარს პატიმრობა შეეფარდათ

16 აგვისტო, 2022 • 665
დედის მკვლელობაში ბრალდებულსა და მის მეგობარს პატიმრობა შეეფარდათ

17 წლის ბიჭს, რომელსაც მეგობართან ერთად, ბრალი დედის მკვლელობაში ედება, სასამართლომ აღკვეთის ღონისძიების სახით პატიმრობა შეუფარდა.

35 წლის ქალი დანით მიყენებული რამდენიმე ჭრილობის შედეგად 13 აგვისტოს დაიღუპა. შსს-ს თქმით, მკვლელობის ბრალდებით დააკავეს გარდაცვლილის 17 წლის შვილი, რომელსაც უწყების ვერსიით, დანაშაულის ჩადენაში მისი 19 წლის მეგობარი დაეხმარა, რომელიც ასევე პატიმრობაში იმყოფება.

ორივე მათგანს დღეს, 16 აგვისტოს, თბილისის საქალაქო სასამართლომ აღკვეთის ღონისძიების სახით პატიმრობა შეუფარდა. არასრულწლოვანს ბრალი წაუყენეს „ოჯახის წევრის მიმართ ჯგუფურად ჩადენილ განზრახ მკვლელობის“ მუხლით, ხოლო მეგობარს – „ჯგუფურად ჩადენილი განზრახ მკვლელობის“ მუხლით.

ბრალი დამტკიცების შემთხვევაში 16-დან 20 წლამდე ან უვადო თავისუფლების აღკვეთას ითვალისწინებს.

მასალების გადაბეჭდვის წესი