ახალი ამბებირეკლამა

საოჯახო სასტუმრო „სხალთა”- პატარა სამოთხე ხულოში

9 აგვისტო, 2022 • 1963
საოჯახო სასტუმრო „სხალთა”- პატარა სამოთხე ხულოში

იზოლდა სურმანიძე სხალთაში ხიმშიაშვილების მუზეუმის დირექტორია, პარალელურად მუნიციპალიტეტის „ქალთა ოთახს“ ხელმძღვანელობს და სოფლის საკუთარ სახლში უკვე ხუთი წელია საოჯახო სასტუმრო „სხალთას” ამუშავებს.

სახლი ხისაა. ეზოში შესვლისთანავე ხის სასიამოვნო სუნს იგრძნობთ. აქვეა ძველი ნალია, რომლის ქვეშაც უკვე დაჩეხილი და ზამთრისთვის მომარაგებული შეშაა გაფენილი.

სახლში საძინებლები, სამზარეულო, მისაღები ოთახი – ყველაფერი ხისაა, დიასახლისს არ შეუღებავს კედლები, ისე დატოვა, როგორც იყო, ბუნებრივად, რადგან აქ მოსულმა სტუმრებმა ბუნებასთან სიახლოვე სახლში ფეხის შედგმისთანავე უნდა იგრძნონ.

იზოლდა სურმანიძე

სანამ სახლში შეხვალთ, უზარმაზარი, ნაყოფით დახუნძლული, ალუბლის, თეთრი თუთისა და მსხლის ხეების ქვეშ უნდა გაიაროთ. იქვეა ხის მრგვალი ფანჩატური, სადაც დიდი, ხის მრგვალი მაგიდა თითქმის ყოველდღე ივსება ათასგვარი კერძით სტუმრებისთვის.

ფანჩატური იზოლდა სურმანიძის საოჯახო სასტუმრო „სხალთაში”

ხულოს კარტოფილი

იზოლდა სურმანიძემ საკუთარ საცხოვრებელ სახლში საოჯახო სასტუმრო 2017 წელს გახსნა. სივრცე თავიდან მხოლოდ 8 სტუმრისთვის იყო გათვლილი, ახლა კი საოჯახო სასტუმრო „სხალთას“ უკვე 17 ვიზიტორის მიღება შეუძლია.

საოჯახო სასტუმროს განვითარებაში მას კომპანია „აჭარისწყალი ჯორჯიას“  სოციალური პროექტების ფარგლებში გამოყოფილი დაფინანსება დაეხმარა.

სასტუმროს მეპატრონე საკუთარ ცხოვრებაზე, საქმიანობასა და სამომავლო გეგმებზე საუბრობს:

„ყოველთვის საზოგადოებრივი საქმით ვიყავი დაკავებული, ვყოფილვარ სოფლის საბჭოს თავმჯდომარე, საკრებულოს თავმჯდომარე, მერის წარმომადგენელი, ახლა მუზეუმის დირექტორი და ქალთა ოთახის ხელმძღვანელი ვარ.

ხალხზე ზრუნვის და პასუხისმგებლობის გრძნობა ამ ვალდებულებებით ჩამომიყალიბდა, ამის შემდეგ გაჩნდა ჩემს ცხოვრებაში საინტერესო იდეები, ეკონომიკური გაძლიერების სურვილი და საკუთარი ბიზნესის დაწყებაც ასე გადავწყვიტე.

მინდა ჩემი აქტიურობით სოფლად მცხოვრებ ახალგაზრდებს მაგალითი მივცე და ვაჩვენო, რომ აქაც შეიძლება ცხოვრება და საქმის კეთება, თუკი საკუთარ ცხოვრებას და ხვალინდელ დღეს კარგად დაგეგმავ“ – ამბობს იზოლდა სურმანიძე.

იზოლდა სურმანიძე

პირველი გრანტი საოჯახო სასტუმროს მოსაწყობად მან 2016 წელს მიიღო პროექტიდან – „აწარმოე საქართველოში“. იზოლდა ამბობს, რომ მის სახლში მუდმივად ხალხმრავლობა და სტუმრების მიმოსვლა იყო. სტუმარმასპინძლობის ეს ტრადიცია იზოლდამ საოჯახო ბიზნესის საფუძვლად აქცია.

იზოლდა სურმანიძე საოჯახო სასტუმროს ამოქმედებისთანავე მიხვდა, რომ სწორი ბიზნესსტრატეგია შეიმუშავა და სტუმრებიც არასდროს მოაკლდებოდა სხალთაში მის საოჯახო სასტუმროს:

„აჭარისწყალი ჯორჯიას“ დაფინანსებით ბევრი რამ შევმატე საოჯახო სასტუმროს. კიდევ ბევრი ჩანაფიქრი მაქვს, ეზოში მინდა მოვაწყო საკონფერენციო სივრცე. ჩემთან ხშირად მოდიან არასამთავრობო ორგანიზაციების წარმომადგენლები და ხვდებიან სხვადასხვა ჯგუფებს, ამ პრაქტიკამ მიბიძგა საკონფერენციო სივრცეზე ფიქრისკენ.

თაგოდანაც ხშირად ჩამოდიან ტურისტები და სადილს მიკვეთენ. ჩემი ვიზიტორების 50% უცხოელია. ამ დიდ სახლში მხოლოდ მე და ჩემი მეუღლე ვცხოვრობთ. ჩვენი სამი შვილი ბათუმშია“ – ამბობს საოჯახო სასტუმრო „სხალთას“ მეპატრონე.

იზოლდა სურმანიძე დაუჯერებელი სისწრაფით ამზადებს ათასნაირ კერძს თუ ტრადიციულ ტკბილეულს, იცინის, ხუმრობს, შიგადაშიგ ამა თუ იმ აჭარული კერძის კვალიფიციურ რეცეპტს გასცემს და დაუღალავად ფუსფუსებს ყვავილებით მოფენილ ეზოში.

ეზო

„არ შემიძლია ერთ ადგილას ყოფნა, უნდა ვმოქმედებდე. ჩემთვის ცუდი დღე ნიშნავს დღეს, როცა ჭიშკარს სტუმარი არ აღებს, როცა ეზო ცარიელია. პანდემიის დროს ბევრი სტუმარი მყავდა, უცხოეთში რომ ვერ მიდიოდა ხალხი, მოდიოდნენ ჩემთან.

მინდა საქართველოს ყველა მოქალაქემ ერთხელ მაინც ნახოს მთიანი აჭარა, გაეცნოს სხალთა-ხიხანის ისტორიას, ნახოს ხიმშიაშვილების საცხოვრებელი სახლი და იცოდეს მათი გმირობის ამბავი. ჩვენი ხეობის მარგალიტი მეთორმეტე საუკუნის დასასრულს აგებული სხალთის ტაძარია“ – ამბობს იზოლდა სურმანიძე.

დღის განმავლობაში იზოლდა ხულოში მცხოვრებ ქალებს ხვდება „ქალთა ოთახის“ ფარგლებში პრობლემებსა და გამოწვევებზე სასაუბროდ, სამუშაო დროს მუზეუმში ატარებს და საოჯახო სასტუმროს ვიზიტორთა მასპინძლობასაც ასწრებს.

მას მიაჩნია, რომ საზოგადოებრივი საკითხების გადაწყვეტისას ქალების როლი უმნიშვნელოვანესია, თუმცა ჩვენს ქვეყანაში ისევ არ აქვთ ქალებს გადაწყვეტილების მიმღებ ინსტანციებში საკმარისი ადგილი.

კომპანია „აჭარისწყალი ჯორჯია“  მომავალშიც გეგმავს ქალების, და არამხოლოდ ქალების ბიზნესიდეების დაფინანსებას ხულოს მუნიციპალიტეტის სოფლებში. კომპანიისთვის ქალების ეკონომიკური გაძლიერება პრიორიტეტული მიმართულებაა.

„აჭარისწყალი ჯორჯიამ“ 2020-21 წლებში სხალთის თემში 9 ბიზნესპროექტი დააფინანსა. წლევანდელი, 2022 წლის კონკურსისთვის ახალი განცხადებების მიღება ახლაც მიმდინარეობს.

„აჭარისწყალი ჯორჯიას“ წარმომადგენლის, ჯანგულ შაინიძის თქმით, იზოლდა სურმანიძის საოჯახო სასტუმრო „სხალთა“ ერთ-ერთი ყველაზე წარმატებული პროექტია კომპანიის მიერ დაფინანსებულ პროექტებს შორის.

„ვაკვირდებით და მონიტორინგს ვუწევთ ჩვენს მიერ დაფინანსებულ საქმიანობებს, თამამად შეიძლება ითქვას, რომ ამ საოჯახო სასტუმრომ მოლოდინს გადააჭარბა და ეს სრულად მეპატრონის დაუღალავი შრომის და საქმის სიყვარულის შედეგია“ – ამბობს ჯანგულ შაინიძე.

ჯანგულ შაინიძე – კომპანია „აჭარისწყალი ჯორჯიას” წარმომადგენელი

მისივე თქმით, კომპანია „აჭარისწყალი ჯორჯია“ სამომავლოდაც არაერთი პროეტის დაფინანსებას გეგმავს, რომლის მიზანიც ქალთა ეკონომიკური გაძლიერება იქნება ხულოს მუნიციპალიტეტის სოფლებში.

მასალების გადაბეჭდვის წესი