საქართველოს პრეზიდენტი, სალომე ზურაბიშვილი განცხადებას ავრცელებს, სადაც წერს, რომ ქვეყნისთვის ასეთ მნიშვნელოვან მომენტში ანტიდასავლური და ჰომოფობური ჯგუფების გააქტიურება შეუძლებელია, არ იყოს მართული.
„ქვეყანა, რომლის მოსახლეობის 80%-ზე მეტი ევროკავშირში გაწევრიანებისა და ევროპული გზის მომხრეა, წარმოუდგენელია და ლოგიკას არ ექვემდებარება, იმ პრორუსული, ძალადობრივი, ჰომოფობიურად განწყობილი და ანტიევროპული ჯგუფების გააქტიურებები ქვეყნისთვის უმნიშვნელოვანეს მომენტებში იყოს სპონტანური და არამართული.
ეს არის გეგმა, რათა მსგავსი პროვოკაციებით საქართველოს ხელი შეეშალოს ევროინტეგრაციის გზაზე, წარმოჩინდეს, როგორც ანტიდასვლური და ანტიევროპული სახელმწიფო.
ყოვლად მიუღებელია მსგავსი ქმედებები და დასაგმობია, რაც აზიანებს ქვეყნის ევროპულ მომავალს“, – წერს ზურაბიშვილი.
თბილისში, ევროკავშირის წარმომადგენლობის ოფისთან, ანტიდასავლური და ჰომოფობიური ჯგუფების მიერ ორგანიზებული აქციის 7 მონაწილე დააკავეს, მათ შორის არის გურამ ფალავანდიშვილიც.
თუმცა, გურამ ფალავანდიშვილი და მისი შვილი – ალექსანდრე ფალავანდიშვილი, მალევე გამოუშვეს დაკითხვიდან. მალევე ის პრორუსული არხის „ალტინფოს“ ეთერში გამოჩნდა.
