იურისტი სულხან სალაძე აცხადებს, რომ ეროვნული მუზეუმის თანამშრომლებს, რომლებმაც კანონით დადგენილი წესით მუზეუმის დირექტორატის სხდომის ოქმები მიაწოდეს, თეა წულუკიანმა დისციპლინური პასუხისმგებლობა დააკისრა.
სალაძის თქმით, მუზეუმის აღნიშნულ თანამშრომლებისთვის კულტრუის სამინისტრომ სანქციების სახედ გამოიყენა საყვედური და თანამდებობრივი სარგოს დაკავება.
„თეა წულუკიანის კულტურის მინისტრად ყოფნა რამხელა უბედურებაა, უკეთ რომ გაიგოთ, ეს ამბავი უნდა იცოდეთ. დაახლოებით ერთი თვის წინ საქართველოს ეროვნული მუზეუმიდან ოფიციალურად გამოვითხოვე მუზეუმის დირექტორატის სხდომის ოქმები. ეროვნულმა მუზეუმმა, დადგენილი წესით, კანონის შესაბამისად, მომაწოდა დირექტორატის ყველა ღია სხდომის ოქმი (მაშინ ჯერ კიდევ არ ჰქონდა დაბლოკილი წულუკიანს ეროვნული მუზეუმიდან საჯარო ინფორმაციის გაცემა). მოგვიანებით, სხდომის ეს ოქმები ხელმისაწვდომი გახდა სხვადასხვა მედიასაშუალებებისათვის.
და იცით, ამის შემდეგ რა მოხდა? სამინისტროს გენერალურმა ინსპექციამ, არაფრისგან გამოგონილი დისციპლინური გადაცდომის მოტივით, დისციპლინური წარმოება „ჩაატარა“. შედეგად, ეროვნული მუზეუმის იმ თანამშრომლებს, ვინც კანონით დაკისრებული მოვალეობები შეასრულეს, დისციპლინური პასუხისმგებლობა დააკისრა! სანქციების სახედ გამოყენებული იქნა – საყვედური და თანამდებობრივი სარგოს დაკავება!
კი, ამასაც მოვესწარით, წულუკიანის სამართალში ყველაფერი პირიქითაა, ვინც გაბედავს და საჯარო ინფორმაციას გასცემს, სასტიკად დაისჯება“, – წერს სულხან სალაძე.
ნეტგაზეთმა სცადა კულტურის სამინისტროსთან გადაემოწმებინა, რატომ დაეკისრათ მუზეუმის თანამშრომლებს დისციპლინური პასუხისმგებლობა და მათგან პასუხს ველოდებით.
განახლება:
მოგვიანებით, ეროვნულმა მუზეუმმა სულხან სალაძის საპასუხოდ განცხადება გაავრცელა. მუზეუმის განცხადებით, სინამდვილეში, მოცემულ პირებს ადმინისტრაციული სახდელი დაეკისრათ ისეთი ინფორმაციის გაცემის გამო, რომელმაც საქართველოს ერთ-ერთი რეგიონის მუზეუმში დაცული საგანძური და სხვა მნიშვნელოვანი ექსპონატები დააყენა რისკის ქვეშ.
