უკრაინული სახელმწიფო კომპანია „ენერგოატომი“ აცხადებს, რომ ზაპოროჟიეს ატომური ელექტროსადგურის სიახლოვეს აფეთქებებია. სადგური რუს სამხედროებს აქვთ დაკავებული.
უწყება ამბობს, რომ რუსმა სამხედროებმა სადგურის სიახლოვეს სამხედრო ეკიპირების ნაწილი – ასაფეთქებელი საშუალებები ააფეთქეს. ადგილი, სადაც ეს მოხდა, სადგურის პირველი ენერგობლოკის სიახლოვესაა.
„ჯერჯერობით უცნობია შეიცვალა თუ არა რადიაციული ფონი აფეთქების შემდეგ. ამ ეტაპისთვის, ატომური სადგურის ტერიტორიაზე იმყოფება როსატომის [რუსული უწყება] 11 წარმომადგენელი. ნათელია, რომ აფეთქებები მოედანზე, რომელიც სადგურის სიახლოვესაა, მათი მონაწილეობით ხდება“, – წერს „ენერგოატომი“ ტელეგრამზე.
4 მარტს ცნობილი გახდა, რომ ღამით განხორციელებული დაბომბვის შემდეგ რუსეთის ძალებმა ზაპოროჟიეს ატომური სადგურის დაკავება შეძლეს.
ზაპოროჟიეს ელექტროსადგური ევროპაში ყველაზე დიდია.