რუსეთის ფედერაციის ჯარების შეჭრის შემდეგ, უკრაინის დატოვება უკვე 2 მილიონზე მეტ ადამიანს მოუწია.
ახლა, ამ წუთებში, არაერთი ადამიანი კვეთს რომელიმე მეზობელი ქვეყნის საზღვარს. სხვები კი, – რომელთა ქალაქებსაც ბომბავენ, – ჯერაც ვერ ახერხებენ თავის შეფარებას.
არსებობს მოლოდინი, რომ ლტოლვილების რაოდენობა 5 მილიონს მიაღწევს.
ამ ეტაპზე უკრაინა დადასტურებულად დატოვა 2,011,312-მა ადამიანმა.
ეს მონაცემები გაეროს ლტოლვილთა უმაღლესი კომისარატის (UNHCR-ის) ყოველდღიურად განახლებადი სტატისტიკიდანაა.
რიცხვები აჩვენებს, რომ რუსეთის სამხედრო ქმედებებისგან დაზარალებული ყველაზე მეტი ადამიანი პოლონეთს აფარებს თავს – იქ უკვე 1,2 მილიონზე მეტი ადამიანი გადავიდა.
ამ რუკაზე დატანილ მონაცემების თანახმად, – რომელიც UNHCR-ის სტატისტიკას ეფუძნება, – უკრაინიდან მეზობელ ქვეყნებში გადასული მოსახლეობის რაოდენობა ასეთია:
- პოლონეთი – 1 204 403
- უნგრეთი – 191 348
- სლოვაკეთი – 140 745
- მოლდოვა – 82 762
- რუმინეთი – 82 062
- ბელარუსი – 453
- რუსეთის ფედერაცია** – 99 300
- სხვა ევროპული ქვეყნები – 210 239
ყველა ქვეყნის მონაცემი თარიღდება 7 მარტით, გარდა პოლონეთისა (8 მარტი), რუსეთის ფედერაციისა (8 მარტი), მოლდოვისა (6 მარტი) და რუმინეთისა (6 მარტი).
გაეროს ლტოლვილთა უმაღლესი კომისარიატი რუსეთის ფედერაციაში გადასულებში თვლის იმ ადამიანებსაც, რომლებიც ყირიმსა და დონბასში ცხოვრობდნენ.