როგორც უკრაინული გამოცემა Unian წერს, უკრაინის მინისტრთა კაბინეტმა მიიღო დადგენილება, რომლის შესაბამისად, საომარი მდგომარეობის პერიოდში, ქვეყანაში ქორწინების რეგისტრაცია ერთი მხარის დასწრების გარეშეც იქნება შესაძლებელი.

დადგენილების შესაბამისად, ასეთ შემთხვევაში, სამხედრო მოსამსახურე, პოლიციელი, რიგითი თუ სხვა ტიპის სახელმწიფო სტრუქტურაში მომსახურე პირის განცხადება ქორწინების რეგისტრაციაზე ბარდება უშუალოდ მის ხელმძღვანელს, რომელიც თავის მხრივ, უზრუნველყოფს ქორწინების რეგისტრაციის შესახებ განცხადების დარეგისტრირებას შესაბამის ორგანოში.

ამასთან, სამხედროთა ქორწინების აქტის შედგენა შეუძლია სამხედრო პირის უშუალო ხელმძღვანელს. მაგალითად, უკრაინაში საომარი მოქმედებების დაწყების შემდეგ, ორმა უკრაინელმა ჯარისკაცმა ბარიკადებით გარშემორტყმულ ქალაქის საბჭოში იქორწინა და ქორწინების შემდეგ სამშობლოს დასაცავად გაემართა.

დღეს, 8 მარტს,  მე-13-ე დღეა, რაც რუსეთი უკრაინაში შეიჭრა და სრულმასშტაბიანი ომი დაიწყო. რუსეთმა დაბომბა ქალაქებიც, დაღუპულია ასობით მშვიდობიანი მოქალაქე. ძირითადად ევროკავშირის ქვეყნების მიმართულებით ქვეყანა დატოვა 1.5 მილიონზე მეტმა ადამიანმა. ეს არის მეორე მსოფლიო ომის შემდეგ ევროპაში ყველაზე მასშტაბური და სწრაფი ლტოლვილთა კრიზისი.