გამომძიებელ რეპორტიორთა გაერთიანება „ბელინგქეთის“ (bellingcat) აღმასრულებელი დირექტორი, ხრისტო გროზევი წყაროებზე დაყრდნობით წერს, თუ რას მოითხოვს რუსეთის ფედერაცია მოლაპარაკებებზე უკრაინული მხარისგან:
- ვოლოდიმირ ზელენსკი ფორმალურად დარჩეს პრეზიდენტად, თუმცა რუსეთმა პრემიერ-მინისტრად დანიშნოს იური ბოიკო, – რომელიც 2012-14 წლებში (იანუკოვიჩის მთავრობაში) ვიცე-პრემიერი იყო;
- უკრაინამ აღიაროს ლუგანსკისა და დონეცკის დე ფაქტო რესპუბლიკების დამოუკიდებლობა; ასევე ის, რომ ყირიმი რუსეთის ტერიტორიაა;
- უკრაინამ უარი თქვას ნატოში გაწევრიანების პერსპექტივაზე.
გროზევი წყაროდ ასახელებს „ორ პირს, რომელიც ახლოს არის რუსეთ-უკრაინის მოლაპარაკებების პროცესთან, მათ შორის- არაფორმალურ მოლაპარაკებებთან“.
მისი ცნობითვე, უკრაინის პრეზიდენტი ვოლოდიმირ ზელენსკი ამ პირობების დაკმაყოფილებაზე უარს აცხადებს.
Two persons close to the Russia-Ukraine negotiations (including back channel talks) tell me Russia proposed (1) Zelensky remains pro forma president but Russia appoints Boiko as PM, (2) Ukraine recognizes L/DNR and Crimea, (3) No NATO. Ze told them emphatically no.
— Christo Grozev (@christogrozev) March 7, 2022
„როიტერსთან“ ინტერვიუში კრემლის პრეს-სპიკერმა დმიტრი პესკოვმა განაცხადა, რომ „უკრაინის მხარემ იცის მოთხოვნები“ და მედიასთან საუბარში 2 მოთხოვნა ახსენა:
- „კონსტიტუციაში უნდა შეიტანონ ცვლილებები, რომლის თანახმადაც უკრაინა უარს იტყვის რომელიმე ბლოკში გაწევრიანებაზე“;
- „აღიარონ ყირიმი, როგორც რუსული ტერიტორია, ასევე უნდა აღიარონ დონეცკი და ლუგანსკი დამოუკიდებელ ქვეყნებად“.
„ეს არის და ეს. [დააკმაყოფილონ ეს მოთხოვნები და ომი] მაშინვე შეწყდება“, – განაცხადა პესკოვმა.
რუსეთის ფედერაცია უკრაინაში 24 თებერვალს შეიჭრა და მას შემდეგ უკრაინის ქალაქებს უტევს როგორც სახმელეთო, ისე საჰაერო და საზღვაო გზებით. საერთაშორისო თანამეგობრობამ რუსეთს პასუხად მკაცრი სანქციები დაუწესა.