„ნაციონალური მოძრაობა“ 2022 წლის 5 მარტს, 17:00 საათზე, თბილისში, რუსთაველის გამზირზე საპროტესტო აქციას აანონსებს.
ეს გადაწყვეტილება პოლიტსაბჭოს სხდომის დასრულების შემდეგ გამოაცხადა პარტიის ერთ-ერთმა ლიდერმა, ნიკა მელიამ.
მელიას განცხადებით, სხდომაზე გადაწყდა, რომ „პარტიის ცენტრალური საკითხი არის მიხეილ სააკაშვილის სიცოცხლის გადარჩენა“.
„ერთადერთი გზა მიხეილ სააკაშვილის სიცოცხლის გადარჩენის არის შემდეგი: მიხეილ სააკაშვილი იყოს გადაყვანილი ქვეყნის ფარგლებს გარეთ, უცხოურ კლინიკაში შესაბამისი მკურნალობის მისაღებად“, – განაცხადა ნიკა მელიამ.
მიხეილ სააკაშვილმა 21 თებერვალს, საკუთარ სასამართლო სხდომაზე მეორედ გამოაცხადა უვადო შიმშილობა.
დაკავების დღიდან, 1 ოქტომბრიდან, მიხეილ სააკაშვილი 50 დღის განმავლობაში შიმშილობდა. ექსპრეზიდენტის მხარდამჭერები სამოქალაქო კლინიკაში მის გადაყვანას ითხოვდნენ, რაზეც ხელისუფლება უარს ამბობდა.
შიმშილობის 49-ე დღეს მისი ჯანმრთელობის მდგომარეობა მკვეთრად გაუარესდა და 19-20 ნოემბრის მიჯნაზე, ღამით გორის სამხედრო ჰოსპიტალში გადაიყვანეს. მან ექიმების მეთვალყურეობის ქვეშ კვება სპეციალური პროტოკოლით 20 ნოემბერს განაახლა.
