საერთაშორისო საზოგადოების ინფორმირების მიზნით, საქართველოს საგარეო საქმეთა სამინისტრომ „რუსეთის მიერ ოკუპირებულ საქართველოს ტერიტორიებზე ადამიანის უფლებათა დარღვევების შესახებ“ 2021 წლის შემაჯამებელი ანგარიში გამოაქვეყნა.

საგარეო უწყების ცნობითვე, დოკუმენტი ძირითადად ეფუძნება საერთაშორისო ორგანიზაციების ფარგლებში მიღებულ დოკუმენტებს და მიზნად ისახავს საერთაშორისო საზოგადოების რეგულარულ ინფორმირებას რუსეთის მიერ ოკუპირებულ საქართველოს რეგიონებში – აფხაზეთისა და ცხინვალის რეგიონებში ადამიანის უფლებათა დარღვევების შესახებ.

“იძულებით გადაადგილებული პირები და ლტოლვილები კვლავაც მოკლებული არიან, დაბრუნდნენ საკუთარ სახლებში რუსეთის მიერ ოკუპირებულ  აფხაზეთისა და ცხინვალის რეგიონის ტერიტორიებზე და ამ საკითხში ჯერჯერობით არანაირი პროგრესი არ არსებობს. 

ადამიანის უფლებათა ევროპული სასამართლო, 2021 წლის 21 იანვარს მიღებული გადაწყვეტილებით, ადგენს, რომ რუსეთი ახორციელებს ეფექტურ კონტროლს საქართველოს აფხაზეთისა და ცხინვალის რეგიონებზე და, შესაბამისად, აკისრებს მას სრულ პასუხისმგებლობას მიმდინარე ოკუპაციის შედეგად დაზარალებული ადამიანების ფუნდამენტური უფლებების უხეშ დარღვევებზე”, – ვკითხულობთ ანგარიშში დევნილების საკითხების შესახებ.