უკრაინის საგარეო საქმეთა მინისტრი დმიტრო კულება ინფორმაციას ავრცელებს გაერთიანებული სამეფოს, პოლონეთისა და უკრაინის ალიანსის შექმნის შესახებ.
კულებას ცნობით, ახალი ფორმატის შესახებ სამი ქვეყნის საგარეო საქმეთა მინისტრებს ოფიციალურად ხვალ, 2 თებერვალს უნდა განეცხადებინათ, თუმცა გაერთიანებული სამეფოს საგარეო საქმეთა მინისტრის კორონავირუსით დაავადების გამო, პრეზენტაცია გადაიდო. კულებას თქმით, მანამდე შეუძლია ოთხი ფაქტის გაზიარება:
„1. ასეთი სამმხრივი თანამშრომლობის დაწყების ინიციატივით უკრაინა გასული წლის ოქტომბერში გამოვიდა (მართალი გითხრათ, სამწუხარო იყო იმის დანახვა, რომ პირველი უკრაინელი კომენტატორები ამ ინიციატივას ავტომატურად მიაწერდნენ ჩვენს პარტნიორებს, ამიტომ ვიმეორებ — გჯეროდეთ თქვენი ქვეყნის). მადლობელი ვარ ჩემი კოლეგებისა და მეგობრების — ლიზ ტრასის და ზბიგნევ რაუსის, რომლებიც სწრაფად გამოეხმაურნენ ინიციატივას და დაიწყო სამი ქვეყნის საგარეო საქმეთა სამინისტროების სამმხრივი მუშაობა, რომელშიც თითოეულ ქვეყანას თანაბრად მნიშვნელოვანი წვლილი შეაქვს.
2. ეს ახალი ფორმატი არის ჩვენი მცირე ალიანსების სტრატეგიის ნაწილი, რომელსაც განსაკუთრებული ყურადღება ექცევა უკრაინის პროაქტიულ საგარეო პოლიტიკაში. საქმე ის არის, რომ არ შეიძლება ველოდოთ უსაფრთხოებას და კეთილდღეობას მომავალში, როცა ევროკავშირისა და ნატო-ს წევრები გავხდებით. ისინი დღეს გვჭირდება. ამიტომ უკვე ვაღწევთ პრაქტიკულ გაძლიერებას მეგობარი და თანამოაზრე ქვეყნების მცირე ალიანსებში გაერთიანებით. ჩვენ ვქმნით უსაფრთხოებისა და კეთილდღეობის სარტყელს და ვაძლიერებთ ბალტია-შავი ზღვის ღერძს. ასე გაჩნდა ლუბლინის სამკუთხედი პოლონეთთან და ლიტვასთან, კვადრიგა — თურქეთთან, ასოცირებული ტრიო კი— საქართველოსა და მოლდოვასთან. ყველა მათგანი წარმატებით ვითარდება და უკვე მოაქვს კონკრეტული სარგებელი უკრაინისთვის.
3. ახალი ფორმატი არ არის მიბმული ადგილობრივ გეოგრაფიასთან — ეს არის ქვეყნების გაერთიანება, რომლებიც იზიარებენ საერთო პრინციპებს, ცდილობენ უსაფრთხოების განმტკიცებას და ვაჭრობის განვითარებას, მზად არიან კონკრეტული ქმედებებისთვის. ვარშავას, კიევსა და ლონდონს აქვთ არა მხოლოდ რეალისტური ცნობიერება ევროპის უსაფრთხოების შესახებ და სტრატეგია რუსეთის გამოწვევების წინააღმდეგ, არამედ, ასევე, დიდი პოტენციალი სამმხრივი თანამშრომლობისთვის ვაჭრობის, ინვესტიციებისა და ენერგეტიკის, მათ შორის, განახლებადი ენერგიის სფეროში. ატლანტის ოკეანეში, ბალტიის და შავ ზღვებში ძალების გაერთიანებით, ვქმნით ახალ შესაძლებლობებს ჩვენი ქვეყნებისთვის და მთლიანად რეგიონისთვის.
4. დაიგეგმა, რომ ახალი ფორმატის შექმნის შესახებ პირველი ოფიციალური განცხადება სამი ქვეყნის საგარეო საქმეთა სამინისტროების მიერ ხვალ უნდა გაკეთებულიყო, ჩვენი ბრიტანელი კოლეგის კიევში ვიზიტის ფარგლებში. სამწუხაროდ, ის კოვიდით დაავადდა და ამ პრეზენტაციას გადავდებთ. თუმცა, ამ ხნის განმავლობაში ჩვენი გუნდები არ ისხდებიან უსაქმოდ, არამედ გააგრძელებენ ახალი ფორმატის დახვეწას. გამოიჩინე მოთმინება, გჯეროდეს საკუთარი თავის, უკრაინის და მისი ნამდვილი მეგობრების“, — წერს კულება.
ინფორმაცია იმის შესახებ, რომ დიდი ბრიტანეთი, უკრაინა და პოლონეთი სულ მალე ახალი ალიანსის დაფუძნებას გამოაცხადებდნენ, თავდაპირველად მედიაში გავრცელდა. ლიზ ტრასმა დაადასტურა, რომ მიმდინარეობდა მუშაობა თანამშროლობის გაღრმავებაზე. უკრაინის პრეზიდენტმა ვოლოდიმირ ზელენსკიმ კი რადაში სიტყვით გამოსვლისას თქვა, რომ იქმნებოდა პოლიტიკური თანამშრომლობის ახალი ფორმატი უკრაინას, ბრიტანეთსა და პოლონეთს შორის.
ახალი ფორმატის შექმნა ემთხვევა უკრაინის წინაშე არსებულ უსაფრთხოების გამოწვევებს. იმ ფონზე, როდესაც რუსეთს 100 000-ზე მეტი ჯარისკაცი ჰყავს მობილიზებული უკრაინის საზღვართან, გაერთაინებული სამეფო და პოლონეთი არიან ქვეყნებს შორის, რომლებიც უკრაინას სამხედრო შეიარაღებით ეხმარებიან.
ახალი ალიანსის შექმნის შესახებ ინფორმაცია ზელენსკიმაც დაადასტურა.
