ახალი ამბები

ევროკავშირს ამ ეტაპზე უკრაინიდან დიპლომატები არ გაჰყავს – ბორელი

24 იანვარი, 2022 • 729
ევროკავშირს ამ ეტაპზე უკრაინიდან დიპლომატები არ გაჰყავს – ბორელი

ევროკავშირი, შეერთებული შტატებისგან განსხვავებით, ამ ეტაპზე არ გეგმავს უკრაინიდან დიპლომატებისა და მათი ოჯახების გაყვანას.

ცოტა ხნით ადრე ცნობილი გახდა, რომ ვაშინგტონმა გადაწყვიტა, უკრიანიდან საელჩოს თანამშრომლებისა და მათი ოჯახების ევაკუაცია დაიწყოს, რითაც, როგორც „როიტერსი“ წერს, მიანიშნა, რომ ფიქრობს, რუსეთის სამხედრო თავდასხმა შეიძლება ნებისმიერ დროს დაიწყოს.

„ჩვენ არ ვაპირებთ იგივეს გაკეთებას, რადგან არ ვიცით რაიმე კონკრეტული მიზეზები“, – განაცხადა 24 იანვარს ევროკავშირის უმაღლესმა წარმომადგენელმა საგარეო საქმეთა და უშიშროების პოლიტიკის სფეროში, ჯოზეფ ბორელმა და დასძინა: „მაგრამ (აშშ-ის) სახელმწიფო მდივანი (ენტონი ბლინკენი) შეგვატყობინებს“.

„[რუსეთთან] მოლაპარაკებები მიმდინარეობს“, – განაცხადა ბორელმა და დასძინა, რომ ვერ ხედავს უკრაინის დატოვების მიზეზს, გარდა იმ შემთხვევისა, თუკი ენტონი ბლინკენი არ გააცნობს მათ ინფორმაციას, რაც ამ ნაბიჯს გაამართლებს.


რუსეთი უკრაინაზე თავდასხმის გეგმას უარყოფს, თუმცა ბოლო თვეების განმავლობაში 100 000-ზე მეტი ჯარისკაცი განათავსა უკრაინის საზღვართან.

გასული წლის დეკემბერში რუსეთის საგარეო საქმეთა სამინისტრომ გამოაქვეყნა ორი შეთანხმების პროექტი, რომელთაგან ერთი აშშ-ს მიემართება, ხოლო მეორე — ნატოს.

რუსეთი აშშ-სა და ნატოს სთავაზობს შეთანხმებას „უსაფრთხოების გარანტიებზე”, რომელიც ითვალისწინებს ნატოს აღმოსავლეთით გაფართოების პრევენციას, მათ შორის, 2008 წლის ბუქარესტის სამიტის გადაწყვეტილების უარყოფას, რომლის თანახმადაც უკრაინა და საქართველო ნატოს წევრები გახდებიან.

მოსკოვის მოთხოვნაა:

  • არ განთავსდეს დამატებითი ძალები და შეიარაღება იმ ქვეყნებს მიღმა, სადაც ისინი 1997 წლის მაისისთვის, აღმოსავლეთ ევროპის ქვეყნების ნატო-ში გაწევრიანებამდე იყო;
  • არ განთავსდეს რაკეტები იქ, საიდანაც მეორე მხარის ტერიტორიას საფრთხე შეექმნება;
  • უარი ითქვას უკრაინაში, აღმოსავლეთ ევროპაში, ამიერკავკასიასა და ცენტრალურ აზიაში ნატო-ს სამხედრო საქმიანობაზე.

11 იანვარს ჟენევაში აშშ-რუსეთის დიპლომატიური მოლაპარაკებები გაიმართა, 12 იანვარს ბრიუსელში — ნატო-რუსეთის საბჭოს სხდომა, ხოლო 13 იანვარს ვენაში ეუთო-ს მუდმივმოქმედი საბჭოს სხდომა იმართება. ამ მოლაპარაკებებზე რუსეთმა ნატო-ს გაფართოების შეჩერების პირობა ვერ მიიღო.

შეერთებულმა შტატებმა განაცხადა, რომ მზად არის განიხილოს გარკვეული ზომები, როგორიცაა შეიარაღების კონტროლი და სამხედრო წვრთნების მასშტაბები, მაგრამ ეს უნდა იყოს ორმხრივი.

ამასთან, ვაშინგტონმა გამორიცხა აღმოსავლეთ ევროპაში ნატო-ს სამხედრო ყოფნის შესუსტება და რუსეთისთვის გარანტიის მიცემა, რომ ნატო არ გაფართოვდება.

უკრაინაში რუსეთის შესაძლო შეჭრასთან დაკავშირებული შიშების ფონზე, ბოლო პერიოდში ნატოს არაერთმა წევრმა გამოთქვა კიევისათვის შეიარაღების მიწოდებისათვის მზადყოფნა. აშშ-ის სამხედრო დახმარების პირველი პარტია კიევში უკვე ჩავიდა.

ამასთან, აშშ-მა ნება დართო ლიეტუვას, ლატვიასა და ესტონეთს, ამერიკული წარმოების იარაღი მიაწოდონ უკრაინას. ალიანსის არაერთი წევრი — მათ შორის, დიდი ბრიტანეთი და პოლონეთი — თანახმაა, კიევს შეიარაღება პირდაპირ მიაწოდოს.

მასალების გადაბეჭდვის წესი