ახალი ამბებისამხრეთ კავკასიის ამბები

აფხაზეთში ერთნაირად დასაცავია ქართული და აფხაზური ენები – ზურაბიშვილი

27 ოქტომბერი, 2021 • 1203
აფხაზეთში ერთნაირად დასაცავია ქართული და აფხაზური ენები – ზურაბიშვილი

საქართველოს პრეზიდენტის, სალომე ზურაბიშვილის განცხადებით, დღეს აფხაზეთში ერთნაირად დასაცავია ქართული და აფხაზური ენები.

„აფხაზური ენის დღე კიდევ ერთხელ გვაფიქრებს იმ დამღუპველ რეალობაზე, რომელიც ჩამოყალიბდა აფხაზეთში რუსული ოკუპაციის შედეგად.

დღეს აფხაზეთში ერთნაირად დასაცავია ქართული და აფხაზური ენები!

ოფიციალურად ანტიქართულმა და შინაარსით ანტიაფხაზურმა პოლიტიკამ აფხაზური ენა გაქრობის საფრთხის წინაშე დააყენა, რასაც აღიარებს იუნესკო და მსოფლიო სამეცნიერო საზოგადოება.

დღეს აფხაზეთში ანტიქართული პოლიტიკა საოკუპაციო რეჟიმის მიერ გალში ქართული ენის სწავლების წინააღმდეგ განხორციელებული ქმედებებით, ქართულ ენაზე განათლების მიღების აკრძალვით ხორციელდება.

აფხაზური ენის დასაცავად ყოველი დაგვიანებული და არგადადგმული ნაბიჯი აზარალებს მის სიცოცხლისუნარიანობას.

არსებული რეალობა გვიბიძგებს აფხაზური ენის გადარჩენისა და განვითარებისთვის ინოვაციური გზების ძიებისკენ. ჩვენი ენების დაცვა არის ის ფუნდამენტური მნიშვნელობის მიზანი, რომლის ირგვლივ შესაძლებელი უნდა გახდეს გამყოფი ხაზის ორივე მხარეს არსებული ინტელექტუალური რესურსის გაერთიანება.

ღრმად მწამს, უახლოეს წლებში ერთიანი ძალისხმევით შევძლებთ ამ ტრაგიკული სურათის ცვლილებას და საკუთარი ენების გადარჩენით გადავარჩენთ ჩვენი შვილების საერთო მომავალს და ჩვენს ადგილს მსოფლიო კულტურულ რუკაზე“, – წერია სალომე ზურაბიშვილის მიერ გავრცელებულ განცხადებაში.

მასალების გადაბეჭდვის წესი