ახალი ამბები | , ,

ბრალდებულებმა მოშალეს კედლები, რითაც კორპუსის მდგრადობა დაირღვა – პროკურატურამ 3 პირს ბრალი წარუდგინა

10 ოქტომბერი, 2021 | | 882
ბრალდებულებმა მოშალეს კედლები, რითაც კორპუსის მდგრადობა დაირღვა – პროკურატურამ 3 პირს ბრალი წარუდგინა

პროკურატურამ სამშენებლო სამუშაოს წარმოებისას უსაფრთხოების წესის დარღვევის ფაქტზე დაკავებულ სამ პირს წარუდგინა ბრალი. საუბარია ბათუმში ჩამონგრეული კორპუსის სადარბაზოს პირველ სართულის მესაკუთრესა და ორ მუშაზე.

პირველი სართულზე მდებარე ბინის მესაკუთრე 1975 წელს დაბადებული ზ.ბ., 1962 წელს დაბადებული ხ.ს. და 1992 წელს დაბადებულ გ.ს. შინაგან საქმეთა სამინისტროს თანამშრომლებმა გუშინ, 9 ოქტომბერს დააკავეს.

პროკურატურის ცნობით, შსს-მ გამოძიებით დაადგინა, რომ ზ.ბ. ანაზღაურების სანაცვლოდ ხ.ს.-ს და გ.ს.-ს ბათუმში, 26 მაისის ქუჩა N13-ში მდებარე კორპუსის პირველ სართულზე, მის საკუთრებაში არსებულ საცხოვრებელ ბინებში სამშენებლო-სარეკონსტრუქციო სამუშაოების შესრულებაზე შეუთანხმდა. სამუშაოები ითვალისწინებდა კედლების მოშლასაც.

“2021 წლის 4 ოქტომბრიდან 8 ოქტომბრამდე დროის პერიოდში, ზ.ბ.-სთან შეთანხმებით და მის მიერვე ხელშეკრულების გარეშე აყვანილმა პირებმა – ხ.ს.-მ და გ.ს.-მ, სახელმწიფოსგან ყოველგვარი ნებართვის გარეშე, თვითნებურად აწარმოეს სამშენებლო სამუშაოები, რაც ყოველგვარი საინჟინრო და უსაფრთხოების წესების დარღვევით მიმდინარეობდა, შესაბამისი საინჟინრო ცოდნის მქონე სპეციალისტის მონაწილეობის გარეშე. ბრალდებულებმა მოშალეს როგორც არამზიდი, ასევე მზიდი კონსტრუქცია (კედლები), რითაც დაირღვა საცხოვრებელი კორპუსის სიმტკიცე და მდგრადობა, რამაც გამოიწვია შვიდსართულიანი კორპუსის ნგრევა, რასაც შედეგად მოჰყვა ამავე კორპუსში მყოფი 9 პირის, მათ შორის სამი არასრულწლოვანის გარდაცვალება და უძრავი და მოძრავი ქონების განადგურება”, – ნათქვამია პროკურატურის განცხადებაში.

დაკავებულებს ბრალი წარედგინათ სისხლის სამართლის კოდექსის 240-ე მუხლის მეორე ნაწილით, რაც გულისხმობს სამშენებლო სამუშაოს წარმოებისას უსაფრთხოების წესის დარღვევას, რამაც ადამიანების სიცოცხლის მოსპობა და მძიმე შედეგი გამოიწვია.

მომხდართან დაკავშირებით გამოძიება გრძელდება.

ჩამონგრეულ კორპუსში სარდაფსა და ბინას აერთიანებდნენ – რა ირკვევა საჯარო რეესტრით

მასალების გადაბეჭდვის წესი