ახალი ამბები | , ,

12 ოქტომბრამდე ყველა საარჩევნო-პოლიტიკურ აქტივობას ვწყვეტთ – ოცნება

9 ოქტომბერი, 2021 | | 631
12 ოქტომბრამდე ყველა საარჩევნო-პოლიტიკურ აქტივობას ვწყვეტთ – ოცნება

„ქართული ოცნება“ ამბობს, რომ ბათუმში მომხდარის გამო 12 ოქტომბრამდე საარჩევნო-პოლიტიკურ აქტივობას წყვეტს.

 

„დღეს, თითოეული ქართველი გლოვობს. დაღუპულთა ხსოვნის პატივსაცემად, „ქართული ოცნება“ 12 ოქტომბრამდე ყველა საარჩევნო-პოლიტიკურ აქტივობას წყვეტს,“ – წერს პარტია.

მანამდე წინასაარჩევნო კამპანიის შესახებ გადაწყვეტილება მიიღო ბათუმში მერობის საერთო ოპოზიციურმა კანდიდატმა – გიორგი კირთაძემ.


ბათუმში, 26 მაისის ქუჩაზე, 6-სართულიანი სახლის სადარბაზო 8 ოქტომბერს, მოულოდნელად ჩამოინგრა. ჩამონგრევას წინ არ უძღოდა აფეთქების ხმა.

ბათუმში ჩამონგრეული კორპუსის სადარბაზოსთან მაშველები აგრძელებენ მუშაობას. ამ დროისთვის ნანგრევებიდან ცოცხლად ამოყვანილია 2 ადამიანი, ისინი კლინიკაში გადაიყვანეს. დილით ცნობილი გახდა, რომ ნანგრევებიდან ამოყვანილი ინგა მეკეიძე საავადმყოფოში გარდაიცვალა. მაშველებმა ასევე ამოასვენეს 7 ცხედარი, მათგან სამი– ბავშვია.

შინაგან საქმეთა სამინისტროს ინფორმაციით, ამ ეტაპზე დაკავებულია 3 პირი – პირველ სართულზე არსებული ბინის მეპატრონე და ორი მუშა. უწყება ამბობს, რომ მესაკუთრის დავალებით დაქირავებულმა მუშებმა ხარვეზიანად წარმართეს სარემონტო სამუშაოები, რამაც, საბოლოოდ ნგრევა გამოიწვია.

საქართველოში 11 ოქტომბერი გლოვის დღედ გამოცხადდა.

მასალების გადაბეჭდვის წესი