სენაკის რაიონულმა სასამართლომ 11 წლით პატიმრობა მიუსაჯა კაცს, რომელსაც მიმდინარე წლის 11 მარტს შეზღუდული შესაძლებლობების მქონე პირის გაუპატიურებაში ედებოდა ბრალი. ამის შესახებ ინფორმაციას პროკურატურა ავრცელებს.
“შინაგან საქმეთა სამინისტროს მიერ ჩატარებული გამოძიების შედეგად, ბრალდების მხარის მიერ სასამართლო პროცესზე გამოკვლეული მტკიცებულებებით დადგინდა, რომ 2021 წლის 11 მარტს აბაშის რაიონში ლ.კ-მ წინასწარი შეცნობით შეზღუდული შესაძლებლობების მქონე პირი გააუპატიურა”, — აცხადებს პროკურატურა.
ლ.კ. სამართალდამცველებმა 11 მარტს დააკავეს. მას ბრალი სისხლის სამართლის კოდექსის 137-ე მუხლის მესამე ნაწილის “დ” ქვეპუნქტით წარედგინა, რაც წინასწარი შეცნობით შეზღუდული შესაძლებლობების მქონე პირის გაუპატიურებას გულისხმობს. სენაკის რაიონულმა სასამართლომ ლ.კ. წარდგენილ ბრალდებაში სრულად დამნაშავედ ცნო.
