პარლამენტის წევრი და ტურიზმის ადმინისტრაციის ყოფილი ხელმძღვანელი, მარიამ ქვრივიშვილი ეკონომიკის მინისტრის მოადგილედ დაინიშნა. სამინისტროს ინფორმაციით, ქვრივიშვილი უხელმძღვანელებს ტურიზმის, ავიაციისა და კურორტების განვითარების მიმართულებებს.
პარლამენტში არჩევამდე, 2019-2020 წლებში, ის სამინისტროს ტურიზმის ეროვნულ ადმინისტრაციას ხელმძღვანელობდა. ამავე ადმინისტრაციის ხელმძღვანელის მოადგილის პოსტი ეკავა 2012-2014 წლებში, ხოლო 2014 წლიდან 2019 წლამდე ტუროპერატორ კომპანია „ვოიაჟერის“ გენერალური დირექტორი და, ამავდროულად, ავიაკომპანიის flydubai რეგიონალური მენეჯერი იყო. ქვრივიშვილი თურნავას მე-7 მოადგილე იქნება. პარლამენტის პრესსამსახურში ნეტგაზეთს უთხრეს, რომ ქვრივიშვილს საკანონმდებლო ორგანოში ბაია კვიციანი ჩაანაცვლებს.