ნამახვანჰესის მოწინააღმდეგეებმა ხელისუფლებას მათი მოთხოვნების შესასრულებლად ხვალამდე, 24 მაისის 12:00 საათამდე მისცეს დრო.

საპროტესტო აქციის მონაწილეებს ოთხი ძირითადი მოთხოვნა აქვთ:

• გაწყდეს 2019 წ. 25 აპრილს ხელმოწერილი ხელშეკრულება საქართველოს მთავრობასა და კომპანია „ენკა რინიუებლზს“ შორის მდინარე რიონზე დაგეგმილი ნამოხვანის ჰესების კასკადის მშენებლობის შესახებ და კომპანიამ დატოვოს რიონის ხეობა.
• გაუქმდეს საქართველოს მთავრობის 2019 წლის 21 ნოემბრის #2405 განკარგულება “სახელმწიფო საკუთრებაში არსებული უძრავი ქონების შპს “ენკა რინიუებლზისათვის” აღნაგობის უფლებით გადაცემაზე თანხმობის მიცემისა და პირდაპირი მიყიდვის ფორმით პრივატიზების შესახებ”.
• გაუქმდეს ნამოხვანის ჰესების კასკადზე 2015 წელს გაცემული სამშენებლო ნებართვა და ყველა სხვა მასზე დაფუძნებული დოკუმენტი.
• თანამდებობიდან გადადგეს ეკონომიკისა და მდგრადი განვითარების მინისტრი ნათია თურნავა და დადგეს ყველა იმ პირის პასუხსიმგებლობის საკითხი, რომლებიც ხელს აწერენ ჰესთან დაკავშირებულ დოკუმენტებს.

“ხვალ, 12 საათამდე ეძლევა ხელისუფლებას დრო. წამზომი ჩაირთო. გადაწყვეტილება მათზეა. ჩვენ ამ საქმეს აუცილებლად მივყვებით ბოლომდე. იმისთვის, რომ დავაზღვიოთ ეს პროტესტი, არის ის, რომ ჩვენ ყველა აქ უნდა დავრჩეთ, სანამ ჩვენი მოთხოვნები არ შესრულდება. თუ ხვალ, 12 საათამდე ჩვენი მოთხოვნები არ შესრულდება, ჩვენ მოვახდენთ დედაქალაქის პარალიზებას. ვერავინ ვერსად შეძლებს გადაადგილებას”, — განაცხადა საპროტესტო აქციის ორგანიზატორმა ვარლამ გოლეთიანმა.

მისი თქმით, ხელისუფლებასთან დიალოგს განიხილავს იმ შემთხვევაში, თუ გამოცხადდება მორატორიუმი და ენერგოპოლიტიკის შესამუშავებლად საერთო სახალხო დისკუსია გაიმართება. ულტიმატუმის ვადის ამოწურვამდე აქციის მონაწილეები რესპუბლიკის მოედანზე დარჩენას და კარვების გაშლას გეგმავენ.

თბილისში, რესპუბლიკის მოედანზე “ნამახვანჰესის” საწინააღმდეგო აქცია მიმდინარეობს.

„ნამახვანი ჰესის“ პროექტი ორი, 333 და 100 მგვტ სიმძლავრის ჰესის მშენებლობას გულისხმობს დასავლეთ საქართველოში, მდინარე რიონზე, რასაც მოსახლეობის ნაწილი ეწინააღმდეგება. საპროტესტო მოძრაობის გაძიერების ფონზე, 2021 წლის 12 მარტს ეკონომიკის მინისტრმა ნათია თურნავამ გამოაცხადა, რომ „ნამახვანი ჰესის“ ინვესტორთან დიალოგის შედეგად მიაღწიეს შეთანხმებას, რომ კაშხლისა და წყალსაცავის მშენებლობა ძირითადი კვლევების გადამოწმებამდე არ დაიწყება. მოგვიანებით, მარტის ბოლოს, პრემიერ-მინისტრმა ირაკლი ღარიბაშვილმა განაცხადა, რომ კვლევების ვალიდაციამდე აღნიშნული სამშენებლო სამუშაოები 9-12 თვემდე ვადით შეჩერდებოდა.