საქართველოს მთავრობის საკოორდინაციო საბჭოს გადაწყვეტილებით, 13 მაისიდან ქვეყნის მასშტაბით საზოგადოებრივი ტრანსპორტი და სასწავლო სააღმზრდელო დაწესებულებების მუშაობა აღდგება.
აღნიშნული შეზღუდვები ქვეყანაში გამოცხადებული უქმე დღეების ფარგლებში იყო დაწესებული, რომელიც 12 მაისს იწურება:
“ქვეყანაში 12 მაისის ჩათვლით უქმე დღეებია, შესაბამისად, შეზღუდულია მუნიციპალური ტრანსპორტის და სასწავლო სააღმზრდელო დაწესებულებების ფუნქციონირება. საკოორდინაციო საბჭოს გადაწყვეტილებით, 13 მაისიდან არნიშნული შეზღუდვები მოიხსნება”, – განაცხადეს საკოორდინაციო საბჭოზე.
ბოლო 24 საათში საქართველოში კორონავირუსის 1 788 ახალი შემთხვევა გამოვლინდა, 31 ადამიანი კი გარდაიცვალა. StopCov-ზე გამოქვეყნებული ინფორმაციის თანახმად, ბოლო 24 საათში ქვეყანაში 28 532 კვლევა ჩატარდა, მათ შორის, 20 349 ანტიგენის, 8 183 კი PCR ტესტი იყო.
რაც შეეხება დადებითობის მაჩვენებელს, 10 მაისის მდგომარეობით, დადებითობის დღიური მაჩვენებელი 5.76%-ია, ბოლო 14 დღის განმავლობაში — 6.07%, ხოლო 7 დღეში — 6.35%. ქვეყანაში Covid-19-ის გავრცელებიდან დღემდე გამოვლენილი დადასტურებული შემთხვევების საერთო რაოდენობა 324 256-მდე გაიზარდა. პანდემიის გავრცელებიდან დღემდე ვირუსს, ჯამში, 4 336 ადამიანი ემსხვერპლა.
