ნეტგაზეთი | ყაზახეთი ადგილობრივი წარმოების QazVac ვაქცინის გამოყენებას იწყებს ყაზახეთი ადგილობრივი წარმოების QazVac ვაქცინის გამოყენებას იწყებს – Netgazeti
RU | GE  

ყაზახეთი ადგილობრივი წარმოების QazVac ვაქცინის გამოყენებას იწყებს

ყაზახეთმა დაიწყო ადგილობრივი წარმოების კორონავირუსის საწინააღმდეგო ვაქცინის, QazVac-ის გამოყენება.

France-Presse-ს მიხედვით, ვაქცინის პირველი 50 000 დოზა სახელმწიფო კვლევით ინსიტუტში დამზადდა. იმუნიზაციის სრული პროგრამისთვის ვაქცინის ორი დოზის მიღებაა საჭირო. ამჟამად ვაქცინა გამოცდის მესამე ეტაპს გადის.

მიუხედავად იმისა, რომ ვაქცინის გამოცდის მესამე ეტაპი არ დასრულებულა, ის პირდაპირ ეთერში მიიღო ქვეყნის ჯანდაცვის მინისტრმა ალექსეი ცოიმ, რომელმაც განაცხადა, რომ იმუნიზაციის შემდეგ, თავს კარგად გრძნობს.

მისივე განცხადებით, ყაზახეთის მთავრობა მოლაპარაკებებს აწარმოებს თურქ პარტნიორებთან, ვაქცინის დამატებითი პარტიების საწარმოებლად.

გასულ კვირას ქვეყნის პრეზიდენტმა, ყასიმ-ჟომართ თოყაევმა ხაზი გაუსვა იმას, რომ ყაზახეთი არის ერთ-ერთი იმ მცირე სახელმწიფოთაგან, რომელმაც შეძლო ვაქცინის განვითარება.

გარდა QazVac-ის წარმოებისა, ყაზახეთი გახდა პირველი უცხოური ქვეყანა, სადაც რუსული სპუტნიკ V-ის წარმოება დაიწყეს.

ამჟამად ქვეყანაში ვაქცინაციის პროცესი სწორედ რუსული და ყაზახური ვაქცინებით მიმდინარეობს.

ფოტო გარეკანზე: ყაზახური ვაქცინა/Kazinform


ყაზახეთში ამ დრომდე დაფიქსირდა კორონავირუსის 309 000-ზე მეტი დადასტურებული შემთხვევა და გარდაიცვალა 3,500-ზე მეტი ადამიანი.

ნეტგაზეთის მასალების სხვა გამოცემებში გადაბეჭდვის წესი
ავტორი
ზურაბ მენაღარიშვილი არის ნეტგაზეთის რეპორტიორი 2020 წლის 01 ოქტომბრიდან მობ: +995 574131276; ელ-ფოსტა: zmenaghare@gmail.com