უფროსი პროკურორი ზაზა დათუკიშვილი, რომელიც სისტემაში 10 წელია მუშაობს, თანამდებობას ტოვებს და აცხადებს, რომ მისი მხრიდან პროკურატურის და „დამოუკიდებელი მართლმსაჯულების განვითარების ხელშეწყობა ნაკლებად რეალური ხდება“.

ზაზა დათუკიშვილმა, რომელიც ბოლო 4 წლის განმავლობაში ნაფიც მსაჯულთა სასამართლოს პროკურორი იყო, 22 აპრილს „ფეისბუქის“ პირად გვერდზე დაწერა:

„10-წლიანი მოღვაწეობის მიწურულს ქვეყანაში შექმნილი ვითარება მაფიქრებინებს, რომ ამჟამინდელი როლითა და რესურსით ამ ინსტიტუტის და დამოუკიდებელი მართლმსაჯულების განვითარების ხელშეწყობა ნაკლებად რეალური ხდება“.

მისი თქმით, სწორედ ამ მიზეზით გადაწყვიტა, დატოვოს თანამდებობა: „[სწორედ ამიტომ გადავწყვიტე] მივიღო ახალი გამოწვევა და განვაგრძო დამოუკიდებელი მართლმსაჯულების სისტემის მშენებლობისთვის ბრძოლა აწ უკვე სამოქალაქო სექტორიდან“.