ახალი ამბები

გახარიას გუნდის პოზიცია 20 ივნისზე, მელიაზე, რურუასა და ივანიშვილზე

14 აპრილი, 2021 • 1307
გახარიას გუნდის პოზიცია 20 ივნისზე, მელიაზე, რურუასა და ივანიშვილზე

მას შემდეგ, რაც დღეს, 14 აპრილს, ექს-პრემიერ გიორგი გახარიას გუნდის წევრებმა “ქართული ოცნება” დატოვეს და გახარიასთან ერთად ახალი პარტიის შექმნა დააანონსეს, მათი ნაწილი ხელისუფლებისადმი კრიტიკულად განწყობილი ტელევიზიების ეთერებშიც გამოჩნდა. ამ ტელევიზიებთან არ თანამშრომლობენ მმართველი გუნდის წარმომადგენლები.

გახარიას თანაგუნდელებმა აღნიშნულ მედიასაშუალებებში ისაუბრეს ისეთ თემებზე, როგორიცაა ვადამდელი საპარლამენტო არჩევნები, ნიკა მელიასა და გიორგი რურუას პატიმრობა, 2019 წლის 20 ივნისის მოვლენები, ბიძინა ივანიშვილის ფაქტორი და ა.შ.

მელია და რურუა პოლიტიკური პატიმრები არ არიან

გიორგი გახარიას თანაგუნდელებს, ძირითადი ოპოზიციური პარტიებისგან განსხვავებით, “ნაციონალური მოძრაობის” თავმჯდომარე ნიკა მელია და “მთავარი არხის” მეწილე გიორგი რურუა პოლიტპატიმრებად არ მიაჩნიათ.

თუმცა კიდევ ერთხელ აღნიშნავენ, რომ სწორედ ნიკა მელიას დაკავების ფორმა გახდა წყალგამყოფი გიორგი გახარიასა და მმართველ გუნდს შორის.

“მელიასთან მიმართებით ბატონ გიორგი გახარიასაც არ ჰქონდა პოზიცია, თითქოს მისი იმუნიტეტის შეჩერება არ უნდა მომხდარიყო. ეს კიდევ ერთხელ ცხადყოფდა იმას, რომ თითოეულ მოქალაქეს აქვს კანონის წინაშე თანასწორობის უფლება და ჩვენ ამ უფლების რეალიზება მოვახდინეთ. რაც შეეხება მართლმსაჯულების აღსრულებას, აქ მნიშვნელოვანია ფორმა. საუბარია ოპოზიციური პარტიის სათავო ოფისში ადამიანის დაკავებაზე. ეს იყო წყალგამყოფი საკითხი”, — ამბობს გიორგი ხოჯევანიშვილი “ტვ პირველის” ეთერში.

გახარიას კიდევ ერთი თანაგუნდელი მიხეილ დაუშვილი კი “მთავარი არხის” ეთერში, მმართველი გუნდის მსგავსად, ხაზს უსვამს, რომ ნიკა მელია საკანონმდებლო ორგანოზე შტურმის ორგანიზებაშია ბრალდებული.

“მე ვთვლი, რომ ბატონი ნიკა მელია არ არის პოლიტიკური პატიმარი. ანალოგიურად, ბატონი გიორგი რურუას მიმართ არსებობს კონკრეტული საქმე, სასამართლო პროცესი გრძელდება და, რაც შეეხება პოლიტპატიმრობას, დიახ, ამ შემთხვევაშიც ვფიქრობ, რომ ბატონი გიორგი რურუა არ არის პოლიტპატიმარი”, — განუცხადა “მთავარ არხს” მიხეილ დაუშვილმა.

 

რას ფიქრობენ ვადამდელ არჩევნებზე

მიუხედავად პარლამენტის თავმჯდომარის, არჩილ თალაკვაძის განცხადებისა, რომ ახალი ოპოზიციური პარტია როცა ჩამოყალიბდება, სავარაუდოდ, ვადამდელი არჩევნების შესახებ ოპოზიციის მოთხოვნას შეუერთდება, გახარიას თანაგუნდელები ჯერჯერობით ცალსახა პოზიციას არ გამოხატავენ.

მიხეილ დაუშვილის თქმით, ქვეყანაში შექმნილი პოლიტიკური კრიზისის “საუკეთესო წამალი” ოპოზიციის პარლამენტში შესვლაა.

“ვადამდელ არჩევნებს და ზოგადად, რადიკალიზაციის შეჩერებას რაც შეეხება, აქ საუკეთესო წამალი არის ის, რომ პოლიტიკური პროცესი უბრალოდ ქუჩიდან უნდა დაბრუნდეს იქ, სადაც უნდა იქმნებოდეს პოლიტიკა. ეს არი ყველაზე მნიშვნელოვანი.

როდესაც ჩვენ ვსაუბრობთ 2020 წლის საპარლამენტო არჩევნებზე, ერთი მხრივ, ვკითხულობთ ეუთო/ოდირის დასკვნას, ჩვენი საერთაშორისო პარტნიორების მოწოდებებს და შეფასებებს და ამ შეფასებების საფუძველზე მივდივართ ერთადერთ ლოგიკურ დასკვნამდე, რომ პოლიტიკური რადიკალიზაციის შემცირების საუკეთესო საშუალება არის, რომ ეს პროცესი გადავიდეს იქ, რასაც პარლამენტი ჰქვია და ერთად ვიმუშაოთ ჩვენი ქვეყნის განვითარებაზე”, — ამბობს დაუშვილი.

გიორგი ხოჯევანიშვილი კი ამბობს, რომ გახარიას პარტია უახლოეს მომავალში ყველა არჩევნებში მიიიღებს მონაწილეობას.

“არჩევნებთან დაკავშირებით ერთ მნიშვნელოვან განმარტებას გავაკეთებ. იმის გათვალისწინებით, რომ იქმნება ახალი პოლიტიკური პარტია, შესაბამისად, აღნიშნულ პარტიას ექნება საშუალება, მიიღოს მონაწილეობა ყველა იმ არჩევნებში, რომელიც იქნება უახლოეს მომავალში”, — ამბობს გიორგი ხოჯევანიშვილი.

 

20 ივნისის მოვლენები და გახარია

2019 წლის 20 ივნისის მოვლნები ერთ-ერთია იმ საკითხთა შორის, რომელთან დაკავშირებითაც გიორგი გახარიასთან ყველაზე მეტი კითხვა არსებობს. თუმცა თავად გახარიას თანაგუნდელები ასე არ ფიქრობენ. გიორგი ხოჯევანიშვილის აზრით, გიორგი გახარიამ, რომელიც იმ დროს შს მინისტრი იყო, 20 ივნისის მოვლენებთან დაკავშირებით ბევრჯერ ისაუბრა და საზოგადოებაში  გახარიასთან დაკავშირებით კითხვები “უფრო ნაკლებია”. ამასთან, ხოჯევანიშვილი აღნიშნავს, რომ 20 ივნისზე გახარია თავის წილ პასუხისმგებლობას არასდროს გაჰქცევია.

20 ივნისზე საუბრისას ხოჯევანიშვილიც და დაუშვილიც საკითხს ორად ყოფენ. პირველ ნაწილად სერგეი გავრილოვის პარლამენტის თავმჯდომარის სკამში ჯდომას გამოყოფენ და ამბობენ, რომ ეს “ქართული ოცნების” პასუხისმგებლობა იყო, რაშიც მან ფასი გადაიხადა. მეორე ნაწილად კი გავრილოვის გამო საპროტესტო აქციას გამოყოფენ.

“აქ უნდა გაიმიჯნოს ორი საკითხი. ერთი იყო ის მღელვარება, რაც საზოგადოებას ჰქონდა და მერე იყო უკვე სახელმწიფო ინსტიტუტებზე ძალადობა. სახელმწიფო ინსტიტუტებზე ძალადობა კი ყოვლად დაუშვებელია. იმ დროს გიორგი გახარია იყო შს მინისტრი და მან უზრუნველყო, რომ არ მომხდარიყო სახელმწიფო ინსიტიტუტების შეურაცხყოფა ბოლომდე და ეს ძალადობა იქნა აღკვეთილი”, — ამბობს ხოჯევანიშვილი.

ამასთან, მიხეილ დაუშვილი ამბობს, რომ 20 ივნისის ღამეს პოლიციამ აქციის დასაშლელად “თანაზომიერი და ლეგიტიმური ძალა გამოიყენა”

“თუ პირველი ნაწილი იყო ცალსახად შეცდომა მმართველი ძალის მხრიდან, აქვე უნდა გავითვალისწინოთ, რაც გულისხმობს ძალადობრივ შტურმს საკანონმდებლო ორგანოზე, რა თქმა უნდა, ეს იყო შეცდომა და ამ დროს პოლიციის გადაწყვეტილელები იყო აბსოლუტურად ლეგიტიმური[…] თუ იქ კარგად გავიხსენებთ, რა მოხდა, 2 საათზე მეტი დროის განმავლობაში, მას შემდგ,, რაც დაიწყო ძალადობრივი შტურმი პარლამენტზე, პოლიცია პარლამენტის შენობას, საკანონმდებლო ორგანოს იცავდა აქტიური სპეციალური საშუალებების გამოყენების გარეშე და მხოლოდ მას შემდეგ, რაც შეუძლებელი გახდა ამ ძალადობრივი შტურმის მოგერიება, ამის შემდეგ დაიწყო პოლიციამ აქტიური საშუალებების გამოყენება[…]

იყო გადაცდომები და ამ გადაცდომებზე პასუხისმგებლობა უნდა დადგეს და შესაბამისი საქმეებიც მიმდინარეობს სასამართლოში, მაგრამ, საბოლოო ჯამში, ეს პროცესი იყო ლეგიტიმური და გამოყენებული ძალა იყო თანაზომიერი”, — ამბობს დაუშვილი.

სასამართლო სისტემა

მიხეილ დაუშვილს მოუწია სასამართლო სისტემაზეც ესაუბრა. გახარიას თანაგუნდელს მიაჩნია, რომ დღევანდელი სასამართლო  უკეთესია, ვიდრე წლების წინ იყო. თუმცა, მისი თქმით, გამოწვევები სასამრთლო სისტემაში დღესაც არსებობს.

“როდესაც ჩვენ ვსაუბრობთ სასამართლოზე, ცალსახად უნდა აღინიშნოს, რომ სასამართლო გაცილებით უკეთესია, ვიდრე იყო წლების წინ. ეს არ არის მხოლოდ ჩემი აზრი. არაერთ საერთაშორის შეფასებაში ბოლო წლებში სასამართლოში გატარებული რეფორმები დადებითად ფასდება. მაგრამ არ მითქვამს, რომ იდეალურია.

დღემდე უამრავი გამოწვევა და პრობლემაა სასამართლოში და ამას სჭირდება დროული და ადეკვატური პასუხი. უნდა გავითვალისწინოთ, რომ საკმაოდ კარგი კანონმდებლობაა მიღებული, მაგრამ, სამწუხაროდ, უნდა ვაღიაროთ, პრაქტიკაში ამ კანონმდებლობის აღსრულების პრობლემები დგას”, — ამბობს დაუშვილი.

ბიძინა ივანიშვილის  ფაქტორი

გიორგი გახარიას თანაგუნდელებმა გვერდი ვერ აურეს კითხვას ბიძინა ივანიშვილის ფაქტორთან დაკავშირებით. ოპოზიციაში ფიქრობენ, რომ გახარიას პარტია ივანიშვილის პროექტია და “ქართული ოცნება 2” იქნება.

გიორგი ხოჯევანიშვილი უარყოფს, რომ გიორგი გახარიას პოლიტიკური გეგმები ბიძინა ივანიშვილთანაა დაკავშირებული. მისი თქმით, გახარიას არც გადადგომის დროს და არც გადადგომის შემდეგ ივანიშვილთან კომუნიკაცია არ ჰქონია. ამასთან, ხოჯევანიშვილი იმედოვნებს, რომ ივანიშვილი ქართულ პოლიტიკურ პროცესებში ჩართული აღარაა.

“მე ძალიან დიდი იმედი მაქვს, რომ ეს ასეა[ივანიშვილი არ მონაწილეობს პოლიტიკურ პროცესებში] და ეს ყველაფერი გამოაშკარავადება უახლოეს მომავალში”, — ამბობს ხოჯევანიშვილი.

მიხეილ დაუშვილი კი “ქართული ოცნების” მიღწევებში ივანიშვილის დამსახურებას აღიარებს, თუმცა აღნიშნავს, რომ სწორედ “ოცნების” პირობებში შეიქმნა ქვეყანაში უკიდურესი პოლარიზაცია.

“ის წარმატებები, რომელსაც მიაღწია ქართულმა ოცნებამ, რა თქმა უნდა, ამ ყველაფერში ბიძინა ივანიშვილის როლი იყო უდიდესი, მაგრამ დღეს გვაქვს მოცემულობა ასეთი, რომ ქართული ოცნების პირობებში გვაქვს ორად გაყოფილი პოლიტიკური სივრცე, უდიდესი პოლარიზაცია და რადიკალიზაცია, რომელიც აზიანებს მხოლოდ ჩვენს მოქალაქეს”, — ამბობს დაუშვილი.

მასალების გადაბეჭდვის წესი