შინაგან საქმეთა სამინისტრო ამბობს, რომ „ფორმულას“ თანამშრომელზე ფიზიკური ძალადობის შესახებ უწყებაში შეტყობინება არ შესულა, ხოლო მანქანის დაზიანების ფაქტზე გამოძიება დაიწყო.
დღეს ტელეკომაპანია „ფორმულამ“ თქვა, რომ მის ორ თანამშრომელს თავს დაესხნენ – ერთს ფიზიკურად გაუსწორდნენ, ხოლო მეორეს დაუზიანეს მანქანა, რომელსაც ტელეკომაპნიის ლოგო ეკრა. არხი ორივე ფაქტს ჟურნალისტურ საქმიანობას უკავშირებს.
„შინაგან საქმეთა სამინისტროს ქვემო ქართლის პოლიციის დეპარტამენტმა სოფელ გამარჯვებაში ერთ-ერთი მოქალაქის კუთვნილი ავტომობილის დაზიანების შესახებ შეტყობინების მიღებისთანავე დაიწყო საგამოძიებო ღონისძიებები. გამოიკითხა ავტომობილის მფლობელი, რომელმაც აღნიშნა, რომ არის ტელეკომპანია “ფორმულას” მძღოლი. მომხდარ ფაქტზე გამოძიება სისხლის სამართლის კოდექსის 187-ე მუხლით [ნივთის დაზიანება] მიმდინარეობს.
რაც შეეხება მეორე ფაქტს, რომელზეც ტელეკომპანია “ფორმულა” საუბრობს, შინაგან საქმეთა სამინისტროში აღნიშნულ ფაქტთან დაკავშირებით შეტყობინება არ შემოსულა. ინფორმაციის მიღებისთანავე, უწყება შესაბამის სამართლებრივ რეაგირებას მოახდენს“, – აცხადებენ უწყებაში.
მანამდე ტელეკომპანიაში სპეციალური ბრიფინგი გაიმართა, რა დროსაც არხის დირექტორმა ზუკა გუმბარიძემ მომხდარ ფაქტებზე საუბრისას თქვა:
„მეორე ფაქტი ასევე უკავშირდება ფორმულას მძღოლს, რომელიც არის ნაცემი. მას აღენიშნება ფიზიკური დაზიანებები და უბრალოდ, ბრიფინგამდე რამდენიმე წუთით ადრე მან მთხოვა, რომ მისი და მისი ოჯახის უსაფრთხოებიდან გამომდინარე, არ დაგვესახელებინა“, — ამბობს არხის დირექტორი და საგამოძიებო ორგანოებს დროული რეაგირებისკენ მოუწოდებს.
სანაიაზე თავდასხმის საქმეში ბრალდებულებს აღკვეთის სახით პატიმრობა შეეფარდათ
