სახელმწიფო რწმუნებულებმა 80 მანქანის შესაკეთებლად 270 ათასი ლარი დახარჯეს — TI-ის კვლევა

2020 წელს 9 სახელმწიფო რწმუნებულის ადმინისტრაციამ მანქანების შეკეთება-დიაგნოსტიკისთვის 270 017 ლარი დახარჯა. ამის შესახებ ინფორმაციას “საერთაშორისო გამჭვირვალობა – საქართველო” [TI] ავრცელებს.

არასამთავრობო ორგანიზაციის ცნობით, ცხრავე ადმინისტრაციაში, ჯამში, 80 ავტომანქანაა, მათგან 7 ამორტიზირებული იყო და შვიდივე სამეგრელო-ზემო სვანეთის ადმინისტრაციას ეკუთვნოდა.

რაც შეეხება ხარჯებს, ადმინისტრაციების მიხედვით ავტომანქანების რაოდენობა და მათ შეკეთება-დიაგნოსტიკაზე გაწეული ხარჯები შემდეგნაირად ნაწილდება:

ზემოთ ჩამოთვლილი ავტომანქანების რაოდენობისა და მათზე გაწული ხარჯების მიხედვით, თითო მანქანის შეკეთება-დიაგნოსტიკისთვის საშუალოდ, სულ მცირე, 2 364 ლარი ქვემო ქართლის ადმინისტრაციამ დახარჯა. ყველაზე მეტი თანხა ყველაზე ცოტა მანქანისთვის კი გურიამ გამოიყენა, რომელმაც 6 ავტომობილის შეკეთება-დიაგნოსტიკისთვის 30 345 ლარი დახარჯა. ეს ნიშნავს, რომ საშუალოდ თითო მანქანის შეკეთება/დიაგნოსტიკა გურიის ადმინისტრაციაში 5 057 ლარი დაუჯდათ. თითქმის ანალოგიური მაჩვენებელია კახეთშიც, სადაც ასევე 6 მანქანის შესაკეთებლად რწმუნებულის ადმინისტრაციამ 30 273 ლარი დახარჯა, რაც თითო მანქანაზე საშუალო გადაანგარიშებით 5 045 ლარი გამოდის.

TI-მ გასულ წელს 9 სახელმწიფო რწმუნებულის ადმინისტრაციის ხარჯები შეისწავლა და დაადგინა, რომ საერთო ჯამში, ადმინისტრაციებმა 2020 წელს 5,182,978 დახარჯეს. აღნიშნული თანხის ძირითადი ნაწილი ადმინისტრაციების თანამშრომლებზე ხელფასების სახით გაიცა. დანარჩენი თანხა კი გამოიყენეს პრემიებისთვის/დანამატებისთვის, საწვავისთვის, ავტოპარკის შეკეთებისთვის, ტელეკომუნიკაციებისთვის, მივლინებებისთვის და კვებისთვის.

25 წელია ვწერთ იმაზე, რაც შენ გაწუხებს და რასაც მთავრობა გიმალავს, თუმცა დღეს, რეპრესიული პოლიტიკის პირობებში, როდესაც დამოუკიდებელ გამოცემებს „ქართული ოცნება“ შემოსავლის წყაროს უკეტავს, ამას მარტო ვეღარ შევძლებთ.

ჩვენ არ ვეკუთვნით არცერთ პოლიტიკურ ძალას და ბიზნესჯგუფს. ჩვენ ვეკუთვნით საზოგადოებას.

დღეს შენი მხარდაჭერა გვჭირდება: გახდი „ბათუმელებისა“ და „ნეტგაზეთის“ მხარდამჭერი, თუნდაც თვეში 1 ლარიდან.

წესებსა და პირობებს დეტალურად შეგიძლია გაეცნო მხარდაჭერის პლატფორმაზე.