“ქართული ოცნების” დეპუტატი ირაკლი ზარქუა ამბობს, რომ ერთადერთი პარტია, რომელსაც 2024 წლის საპარლამენტო არჩევნებისთვის ბარიერის 5%-დან 3%-მდე დაწევა არ აწყობს, “ნაციონალური მოძრაობაა”.

მისი თქმით, “ქართული ოცნებას” არც 5%-იანი ბარიერის გადალახვის პრობლემა აქვს, განსხვავებით ენმ-სგან, რომელის მხარდაჭერაც, ზარქუას მტკიცებით, 5%-დან 7%-მდე მერყეობს.

“მხოლოდ ერთადერთ პარტიას, “ნაციონალურ მოძრაობას” არ აწყობს, რომ მისი მძევლობიდან დაიხსნან თავი პატარა პარტიებმა. ამიტომაც არის ეს ნარატივი, რომ ვაჭრობა უწოდეს [2024 წლის საპარლამენტო არჩევნებისთვის საარჩევნო ბარიერის 5%-დან 3%-მდე დაწევას]. ეს არის შეთანხმება. შეთანხმებას არ ითხოვდა ოპოზიცია? დიალოგს არ ითხოვდა? დიალოგის შესაბამისად მივიღეთ გადაწტვეტილება, თორემ ჩვენ მმართველ პარტიას პრობლემა არ გვაქვს, 5%-იანი ბარიერი გადავლახოთ, ეს “ნაციონალურ მოძრაობას” აქვს, 5% თუ 7%-ს შორის რომ მერყეობს”, — განაცხადა ზარქუამ.

პარლამენტში საკონსტიტუციო ცვლილებები რეგისტრირდება, რომელიც 2024 წლის საპარლამენტო არჩევნებისთვის საარჩევნო ბარიერის 5%-დან 3%-მდე დაწევას ითვალისწინებს. თუმცა საკანონმდებლო ორგანოში ცვლილებების მისაღებად საჭირო რაოდენობის დეპუტატი წარმოდგენილი არ არის. იმისათვის, რომ საკონსტიტუციო ცვლილებები მიიღონ, პარლამენტში უნდა შევიდეს ბოიკოტის რეჟიმში მყოფი მინიმუმ 17 დეპუტატი.