ნეტგაზეთი | სახალხო დამცველი ტვ „პირველის“ გადაცემის ანონსს ეხმაურება სახალხო დამცველი ტვ „პირველის“ გადაცემის ანონსს ეხმაურება – Netgazeti
RU | GE  

სახალხო დამცველი ტვ „პირველის“ გადაცემის ანონსს ეხმაურება

საქართველოს სახალხო დამცველი ნინო ლომჯარია ფეისბუქზე გამოეხმაურა ტელეკომპანია „პირველის“ მიერ გავრცელებულ, ჟურნალიტ ნოდარ მელაძის გადაცემის ანონსს, რომლის თანახმადაც „პირველმა“ ბერა ივანიშვილისა და ირაკლი ღარიბაშვილის ფარული ჩანაწერი მოიპოვა.

„წლებია საქართველოში ჩვეულ პრაქტიკად იქცა პოლიტიკური ოპონენტების თუ სხვა მხრივ არასასურველი ადამიანების მორალური განადგურების, მათი დისკრედიტაციის თუ საქმიანი რეპუტაციის შესალახად ფარული ჩანაწერების უკანონო მოპოვება თუ ფაბრიკაცია. მრავალი წელია საზოგადოება უშედეგოდ ითხოვს სამართალდამცავი ორგანოების მხრიდან დროულ და ობიექტურ გამოძიებას და შესაბამისი პირებისათვის პასუხისმგებლობის დაკისრებას. სამწუხაროდ, არც ერთ მსგავს შემთხვევაში არ ჩატარებულა ეფექტური გამოძიება, რაც საზოგადოების თითოეულ წევრს კიდევ უფრო დაუცველს ხდის მომავალში მსგავსი უკანონო და მიუღებელი პრაქტიკისგან.

ხაზგასმით უნდა აღინიშნოს, რომ დღევანდელ და სხვა შემთხვევებშიც, მხოლოდ ეფექტურად ჩატარებული გამოძიების, ჩანაწერების ავთენტურობისა და ნამდვილობის დადგენის შემდეგ შეიძლება შეფასდეს – შეიცავს თუ არა ჩანაწერები ინფორმაციას სავარაუდო დანაშაულებრივ ქმედებებთან დაკავშირებით, რაც ცალკე გამოძიების საგანს უნდა წარმოადგენდეს“ – წერს სახალხო დამცველი.
ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com