ოპოზიციამ ერთობლივ ფორმატში დაანონსებული საპროტესტო აქციები, რომლებიც სახელმწიფო ინსტიტუტების პიკეტირებას ითვალისწინებდა, გადადო.
ოპოზიციის წარმომადგენლებმა განაცხადეს, რომ აქციები გადავადდა ევროპული საბჭოს პრეზიდენტ შარლ მიშელის მიერ შეთანხმებისთვის დასახელებული 2-კვირიანი ვადით.
“იმისთვის, რომ ხელისუფლებას არ მივცეთ დამატებითი მიზეზი, ჩაშალოს მოლაპარაკება, მივიღეთ გადაწყვეტილება, წინააღმდეგობის არაძალადობრივი აქციები გადავდოთ, ვიდრე მოლაპარაკების ვადა არ დასრულდება”, — განაცხადა ოპოზიციის შეხვედრის შემდეგ “სტრატეგია აღმაშენებლის” წევრმა პაატა მანჯგალაძემ.
მისი თქმით, “ერთიან ნაციონალურ მოძრაობას” აქვს სპეციფიკური მდგომარეობა, გამომდინარე მისი ლიდერის პატიმრობიდან, ამიტომ ენმ მოდიფიცირებული ფორმით გამართავს რიგ საპროტესტო აქტივობებს.
ენმ-ის წევრ თინა ბოკუჩავას თქმით, “ერთიანი ნაციონალური მოძრაობისთვის” მნიშვნელოვანია საპროტესტო აქციები ოპოზიციის საერთო ფორმატში, ამიტომ ხვალ, 5 მარტს კანცელარიასთან დაგეგმილი პიკეტირების ნაცვლად, მანქანებით საპროტესტო მსვლელობა გაიმართება რუსთავისკენ. ხოლო 13 მარტს საქალაქო სასამართლოსთან დაგეგმილი აქცია 20 მარტისთვის გადაიდო.
ოპოზიციის წარმომადგენლების თქმით, აქციების მოდიფიკაციის მიზანია, პოლიციელებთან ფიზიკური კონტაქტი გამოირიცხოს.
