ნეტგაზეთი | პოლარიზაციის ფონზე ძალადობა კიდევ უფრო დაუშვებელია – ზურაბიშვილი სანაიაზე პოლარიზაციის ფონზე ძალადობა კიდევ უფრო დაუშვებელია – ზურაბიშვილი სანაიაზე – Netgazeti
RU | GE  

პოლარიზაციის ფონზე ძალადობა კიდევ უფრო დაუშვებელია – ზურაბიშვილი სანაიაზე

პრეზიდენტი სალომე ზურაბიშვილი ჟურნალისტ ვახო სანაიაზე თავდასხმას ეხმაურება და სამართალდამცავებს ფაქტის სწრაფად გამოძიებისკენ მოუწოდებს.

„კატეგორიულად მიუღებელია ნებისმიერი ფორმისა და სახის ძალადობა. ძალადობა, არსებული დაპირისპირებისა და პოლარიზაციის ფონზე კიდევ უფრო დაუშვებელია და მას არანაირი გამართლება არ აქვს“, – დაწერა ზურაბიშვილმა ფეისბუკზე.

„მივმართავ სამართალდამცავ ორგანოებს, სწრაფად გამოიძიონ ფაქტი და დაისაჯონ დამნაშავეები, რათა არ იქნეს წახალისებული ძალადობა“, – განაცხადა მან.

ტელეკომპანია „ფორმულას“ ჟურნალისტს, ვახო სანაიას თავს 24-25 თებერვლის მიჯნაზე, გვიან ღამით დაესხნენ.

როგორც სანაია ამბობს, მას თავს დაესხა ნასვამ მდგომარეობაში მყოფი სამი ადამიანი.

ჟურნალისტის თქმით, დაზიანებები აქვს როგორც თავზე, ასევე სხეულის სხვდასხვა მიდამოში.

მეუღლის, თამუნა ყურაშვილის ცნობით, ჟურნალისტ ვახო სანაიას ტვინის შერყევა დაუდასტურდა.

სანაია თავდასხმას თავის ჟურნალისტურ საქმიანობას უკავაშირებს.

მისი თქმით, თავდმასხმელები მის მიმართ აგრესიას სწორედ ამ ნიშნით ავლენდნენ. შინაგან საქმეთა სამინისტრომ მომხდარის გამო სამი პირი დააკავა.

საქართველოს პრემიერ-მინისტრი ირაკლი ღარიბაშვილი ამბობს, რომ თავდამსხმელები კანონის სრული სიმკაცრით დაისჯებიან.

სანაიაზე თავდასხმას აშშ-ის საელჩოც გამოეხმაურა და მოუწოდა ხელისუფლებას, ეს და მსგავსი ფაქტები სრულად გამოიძიონ.

მეუღლის ცნობით, სანაიას ტვინის შერყევა დაუდასტურდა

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com