თბილისის საპატრულო პოლიცის ერთ-ერთი მაღალჩინოსნის, გოგა მემანიშვილის განცხადებით, 6 თებერვალს, „კომენდანტის საათის“ დამრღვევი აქციის ყველა მონაწილე დაჯარიმდება 2000 ლარით, „გადაადგილების შეზღუდვის“ წესის დარღვევისთვის.
6 თებერვალს, 21:00 საათზე, „სირცხვილიას“ და სხვა აქტივისტების მონაწილეობით თბილისში, პარლამენტის შენობასთან დაიწყო საპროტესტო აქცია „უაზრო რეგულაციების“, მათ შორის ე.წ. კომენდანტის საათის მოხსნის მოთხოვნით.
აქციის მონაწილეებმა, პოლიციის თანხლებით, წინააღმდეგობის გარეშე გაიარეს რამდენიმე ქუჩა და ამ წუთებშიც [ღამის პირველი საათი] დედაენის ბაღში აგრძელებენ აქციას.
თბილისის აქციაზე არავინ დაუჯარიმებიათ. თუმცა, ახლახან საპატრულო პოლიციის მაღალჩინოსანმა, გოგა მემანიშვილმა „ნეტგაზეთს“ განუცხადა:
„როცა მოხდება იმ პირების იდენტიფიცირება, ვინც არღვევს გადაადგილების შეზღუდვას, დაჯარიმდება შესაბამისად. ყველა, ვინც არღვევს და ვისაც არ აქვს შესაბამის ნებართვა“.
გოგა მემანიშვილის თქმით, მათ ადმინისტრაციული წარმოებისთვის აქვთ 2 თვე.
აღსანიშნავია, რომ დღეს ანალოგიური შინაარსის საპროტესტო აქცია გაიმართა ბათუმშიც. თუმცა, ბათუმის აქციის მონაწილეები – 11 პირი, მათ შორის 2 ქალი პოლიციამ დააკავა ადმინისტრაციული წესით.
თვითმხილველების თქმით, ბათუმში, აქციის მონაწილეების დაკავებისას, მოქალაქეებს პოლიცია ფიზიკურად გაუსწორდა.