ნეტგაზეთი | სომხეთში ოპოზიცია სასამართლო კოდექსში ცვლილებების დაჩქარებულად მიღების წინააღმდეგია სომხეთში ოპოზიცია სასამართლო კოდექსში ცვლილებების დაჩქარებულად მიღების წინააღმდეგია – Netgazeti
RU | GE  

სომხეთში ოპოზიცია სასამართლო კოდექსში ცვლილებების დაჩქარებულად მიღების წინააღმდეგია

სომხეთის ეროვნულმა კრებამ მთავრობის კანონპროექტი სასამართლო კოდექსში ცვლილებების შესახებ 83 ხმით 17-ის წინააღმდეგ პირველ მოსმენაზე მიიღო, რაზეც ოპოზიციას კითხვები აქვს.

როგორც azatutyun.am [რადიოთავისუფლების სომხური სამსახური] წერს, ოპოზიციური ფრაქცია “განათლებული სომხეთის” დეპუტატი ტარონ სიმონიანი ამბობს, რომ მისთვის გაუგებარია, რატომ მოიწვია მთავრობამ რიგგარეშე სხდომა პარლამენტში სასამართლო კოდექსის განხილვაზე, ნაცვლად იმისა, რომ ქვეყნის უსაფრთხოების საკითხებზე ემსჯელათ.

“თუკი პარლამენტი დაჩქარებული წესით იმსჯელებდა არცახის ტერიტორიის დეოკუპაციაზე, ან იარაღის კანონში ცვლილებებზე, მაშინ კიდევ გასაგები იქნებოდა რიგგარეშე სხდომა”, – ამბობს სიმონიანი.

სხვა ოპოზიციური ფრაქციის, “აყვავებული სომხეთის” წარმომადგენლებიც უკმაყოფილო არიან რიგგარეშე სხდომის დღის წესრიგით.

ნაირა ზოგრაბიანი მიიჩნევს, რომ პარლამენტში ამჟამად უნდა იხილებოდეს სამხდრო ტყვეების, დეპორტირებულების, ომის შემდეგ საზღვრისპირას მოქცეული სოფლებისა და მათი მოსახლეობის საკითხები, თუმცა ხელისუფლებას, პირველ რიგში, სურს, რომ როგორმე გაზარდოს იმ მოსამართლეთა რიცხვი, რომლებიც დაპატიმრებაზე სანქციებს გასცემს”.

კანონპროექტი სასამართლო კოდექსში ითვალისწინებს მინიმუმ 17 მოსამართლის შტატის შექმნას, რომლებიც იმუშავებენ უშუალოდ დაპატიმრების შუამდგომლობებსა და ძებნის განხილვაზე. იუსტიციის მინისტრის განმარტებით, სპეციალიზირებულ მოსამართლეთა რაოდენობის გაზრდით სისტემა ნაკლებად გადაიტვირთება და შემცირდება განხილვის ვადებიც.

 

ნეტგაზეთის მასალების სხვა გამოცემებში გადაბეჭდვის წესი
ავტორი