საქართველოს პარლამენტმა პარლამენტის გამოკლებული წევრების ნაცვლად 4 ახალი დეპუტატის დანიშვნას კენჭი უყარა და დაამტკიცა. ამ გადაწყვეტილებას 81 მომხრე და არცერთი წინააღმდეგი ჰყავდა.

4 გამოკლებულ დეპუტატს შორის ერთი გიორგი გახარიაა, რომლის ნაცვლადაც პარლამენტში ლევან მგალობლიშვილი შევა. დანარჩენი სამი კი „პატრიოტთა ალიანსის“ წევრია.

მანამდე ამავე პარტიის სამმა წევრმა და ლიდერმა – ირმა ინაშვილმა, გოჩა თევდორაძემ და გიორგი ლომიამ – საპარლამენტო მანდატზე უარი განაცხადა. თუმცა ამ მანდატს „პატრიოტთა ალიანსის“ სამი სხვა წევრი – გელა მიქაძე, დავით ზილფიმიანი და ფრიდონ ინჯია – დათანხმდა.

ახალი დეპუტატების დამტკიცების შემდეგ, პარლამენტის თავმჯდომარემ, არჩილ თალაკვაძემ თქვა, რომ ამიერიდან პარლამენტში ოპოზიციის წევრებიც იქნებიან წარმოდგენილნი.

ამასთანავე, ფრიდონ ინჯიამ სხდომის შემდეგ ბრიფინგი გამართა, სადაც თქვა, რომ „პატრიოტთა ალიანსს“ ტოვებს.

გუშინ, 4 იანვარს, პარლამენტმა  “პატრიოტთა ალიანსის” წევრებს, ირმა ინაშვილს, გიორგი ლომიას და გოჩა თევდორაძეს სადეპუტატო უფლებამოსილება  შეუწყვიტა.

ცენტრალური საარჩევნო კომისიის მონაცემების თანახმად, “პატრიოტთა ალიანსმა” 2020 წლის საპარალამენტო არჩევნებზე 3.14% მიიღო და 4 საპარლამენტო მანდატი მოიპოვა, თუმცა, სხვა  ოპოზიციური პარტიების მსგავსად, საპარლამენტო მანდატებზე უარი “პატრიოტთა ალიანსმაც” თქვა.