ამერიკის შეერთებული შტატების მარეგულირებელმა ორგანომ – “საკვებისა და მედიკამენტების ადმინისტრაციამ” – პარასკევ საღამოს დაჩქარებული წესით გასცა Pfizer/BioNTech-ის მიერ დამზადებული კორონავირუსის ვაქცინის გამოყენების უფლება.

აღნიშული ნებართვა გულისხმობს Pfizer/BioNTech-ის ვაქცინის გამოყენებას საგანგებო ვითარებაში. უკვე რამდენიმე დღეში დაიწყება ვაქცინის აშშ-ში განაწილება და მილიონობით ადამიანის ვაქცინაცია, რომელთა შორის პირველ რიგში იქნება სამედიცინო პერსონალი, ასევე თავშესაფრებში მცხოვრები/მომუშავე ხალხი და სხვა რისკ ჯგუფის წარმომადგენელი.

როგორც CNN იტყობინება, Pfizer/BioNTech მოგვიანებით შეეცდება მიიღოს FDA-ის ახალი ნებართვა, რომელიც უკვე შესაძლებელს გახდის ჩვეულებრივ ვითარებაში ამ ვაქცინის სრულად გამოყენებას.

კვლევები ადასტურებს, რომ Pfizer/BioNTech-ის ვაქცინა არის უსაფრხო და აქვს 95%-იანი ეფექტიანობა. ამ ვაქცინასთან დაკავშირებულ ერთ-ერთ გამოწვევად სახელდება მისი ლოჯისტიკის სირთულე, რადგან ის მოითხოვს განსაკუთრებულ პირობებში შენახვა-ტრანსპორტირებას -70 გრადუს ცელსიუსზე, რაც ადვილად ხელმისაწვდომი არ არის.

რაც შეეხება საქართველოს, როგორც დაავადებათა კონტროლის ეროვნული ცენტრის ხელმძღვანელმა ამირან გამყრელიძემ აღნიშნა, ქვეყანა ვაქცინას ელოდება მარტ-აპრილში ჯანდაცვის მსოფლიო ორგანიზაციის მიერ შექმნილი კოვაქს პლატფორმის გავლით. თუმცა, როგორც ის ამბობს, საქართველო აწარმოებს მოლაპარაკებებს უშუალოდ მწარმოებლებთან, რათა ვაქცინის გარკვეული რაოდენობა უფრო ადრე – იანვარ-თებერვალში გახდეს ხელმისაწვდომი.