მეათე მოწვევის პარლამენტის პირველი შეკრების დღეს ოპოზიცია ფართომასშტაბიან აქციას აღარ ჩაატარებს. ამის შესახებ დღეს, “ლელოს” ოფისში შეხვედრის შემდეგ ოპოზიციის წევრებმა განაცხადეს.

“ერთი რამ დადასტურებით შემიძლია ვთქვა, საერთო კონსენსუსი არსებობს – პარლამენტის წინ ხალხმრავალი აქცია არ იგეგმება, ეს შემიძლია დავადასტურო. ტრადიციული გაგებით, რუსთაველის გამზირზე, პარლამენტის წინ აქციები არ იქნება”, — განაცხადა გიგი უგულავამ.

მისივე თქმით, ოპოზიცია რამდენიმე იდეას განიხილავს და ოპოზიციის გეგმის შესახებ ხვალ, 28 ნოემბერს, “ლეიბორისტული პარტიის” ოფისში ოპოზიციის გაფართოებული შეხვედრისას გახდება ცნობილი.

პარალელურად, ოპოზიცია სხვადასხვა სექტორის წარმომადგენლებთან შეხვედრას და კორონავირუსთან დაკავშირებულ რეგულაციებსა და ქვეყანაში შექმნილ ეკონომიკიკურ მდგომარეობაზე საუბარს გეგმავს.