ნეტგაზეთი | ომბუდსმენის განცხადებით, შეზღუდვების მოხსნა თანაბრად უნდა ეხებოდეს ყველა კონფესიას ომბუდსმენის განცხადებით, შეზღუდვების მოხსნა თანაბრად უნდა ეხებოდეს ყველა კონფესიას – Netgazeti
RU | GE  

ომბუდსმენის განცხადებით, შეზღუდვების მოხსნა თანაბრად უნდა ეხებოდეს ყველა კონფესიას

საქართველოს სახალხო დამცველის აპარატი ეხმაურება 6 იანვარს (მართლმადიდებლური შობის ღამეს) შეზღუდვის მოხსნას და ამბობს, რომ სახელმწიფოს მიერ დაწესებული რეგულაციები ყველა რელიგიას თანაბრად უნდა ეხებოდეს.

სახალხო დამცველი მიიჩნევს, რომ საქართველოს მთავრობის მიერ ახალ კორონავირუსთან დაკავშირებული რეგულაციები, რომელიც 2020 წლის 28 ნოემბრიდან 2021 წლის 31 იანვრის ჩათვლით, მათ შორის, 21:00 საათის შემდეგ გადაადგილების და საჯარო სივრცეში ყოფნის აკრძალვას გულისხმობს, შესაძლოა, არადომინანტი რელიგიური გაერთიანებების მიმართ დისკრიმინაციული იყოს.

„აღსანიშნავია, რომ მსგავსი შეზღუდვა არ გავრცელდება შობის – 6 იანვრის ღამეს, ამავე პერიოდში სხვა რელიგიური გაერთიანებების დღესასწაულები კი, რომლებიც შესაძლოა, ასევე ღამისთევით აღინიშნებოდეს, მთავრობის მიერ გავრცელებულ განცხადებაში მოხსენიებული არ არის.

სახალხო დამცველი აღნიშნავს, რომ მნიშვნელოვანია, სახელმწიფოს მიერ დაწესებული რეგულაციები მსგავსად მიემართებოდეს ყველა რელიგიურ გაერთიანებას, რათა მათ თანასწორ საფუძველზე შეძლონ რელიგიის თავისუფლების რეალიზება. რომელიმე რელიგიური გაერთიანებისთვის უპირატესობის დაუსაბუთებლად მინიჭებით, ბუნდოვანი რჩება სხვა გაერთიანებებისთვის ამავე უფლების ჩამორთმევის ლეგიტიმურობა“, – ამბობს სახალხო დამცველი.

აპარატი მოუწოდებს მთავრობას, განიხილოს წესიდან გამონაკლისის დაწესების შესაძლებლობა, იმ რელიგიურ დღესასწაულებზე, რომელთა აღნიშვნაც ღამის გათევას ითვალისწინებს.

ამავე თემაზე წაიკითხეთ:

“სახეზეა უთანასწორო მოპყრობა” – რატომ იხსნება გადაადგილების შეზღუდვა მხოლოდ 6 იანვრის ღამეს

„გულნატკენები და გაბრაზებულებიც ვართ“ – მთავრობას რელიგიური უმცირესობები ისევ დაავიწყდა

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ბიძინაშვილი არის რეპორტიორი 2017 წლის 25 სექტემბრიდან