ახალი ამბები

აშშ-ში დათანხმდნენ რემდესივირის COVID-19-ის სამკურნალოდ გამოყენებას

23 ოქტომბერი, 2020 • 887
აშშ-ში დათანხმდნენ რემდესივირის COVID-19-ის სამკურნალოდ გამოყენებას

აშშ-ის მარეგულირებელი ორგანოები დათანხმდნენ ანტივისურული მედიკამენტის, რემდესივირის გამოყენებას COVID-19-ის სამკურნალოდ. აშშ-ის საკვებისა და წამლების ადმინისტრაციამ მწვანე შუქი აუნთო მედიკამენტის გამოყენებას 12 წლისა და უფროსი ასაკის პაციენტებში, რომლებიც მინიმუმ 40 კილოგრამს იწონიან და საავადმყოფოში მოთავსებას ექვემდებარებიან.

უწყების თანახმად, აღნიშნულ გადაწყვეტილებას წინ უძღოდა სამი ფართომასშტაბიანი კვლევა, რომლებშიც მონაწილეობდნენ როგორც მსუბუქი, ისე მძიმე კოვიდპაციენტები. ერთ-ერთი კვლევით დადგინდა, რომ ველკური(რემდესივირის ბრენდის სახელწოდება) 15-დან 10 დღემდე ამცირებს COVID-19-ის მკურნალობისათვის საჭირო საშუალო პერიოდს.

ამის შემდეგ, 22 ოქტომბერს, ის გახდა პირველი მედიკამენტი, რომლის გამოყენებასაც საკვებისა და წამლების ადმინისტრაცია დათანხმდა ახალი კორონავირუსის სამკურნალოდ.

არაერთ ქვეყანას რემდესივირი უკვე შეტანილი აქვს ახალი კორონავირუსის სამკურნალო მედიკამენტების სიაში. ის იყო ერთ-ერთი პირველი, რომელიც ვირუსის სამკურნალოდ გამოიყენეს.

აშშ-ის გადაწყვეტილებამდე რამდენიმე დღით ადრე, თავისი კვლევის შედეგები გამოაქვეყნა ჯანდაცვის მსოფლიო ორგანიზაციამ, რომელთა მიხედვითაც ანტივირუსული მედიკამენტი რემდესივირი არ ახდენს მნიშვნელოვან გავლენას არც კოვიდპაციენტის სიცოცხლის გადარჩენის შანსებზე და არც იმ დროის ხანგრძლივობაზე, რომელსაც ინფიცირებული საავადმყოფოში ატარებს.

“ჯანმოს” ამ კვლევას რემდესივირის მწარმოებელ “გილეადში” აკრიტიკებენ და მის შედეგებს არ იზიარებენ. კომპანიის განცხადებით, ის “არათანმიმდევრულად გამოიყურება” სხვა არაერთ კვლევასთან შედარებით, რომელიც სხვადასხვა სამეცნიერო ჟურნალშია გამოქვეყნებული და რემდესივირის სარგებლიანობას ამტკიცებს.

მასალების გადაბეჭდვის წესი