ახალი ამბები

საქმე ეხება ფულის გათეთრების შესაძლო სქემას – პროკურატურა სპეცოპერაციაზე

13 ოქტომბერი, 2020 • 965
საქმე ეხება ფულის გათეთრების შესაძლო სქემას – პროკურატურა სპეცოპერაციაზე

საქართველოს გენერალური პროკურატურის ინფორმაციით, დღეს, 13 ოქტომბერს, თბილისში, ერთ-ერთ კომპანიაში ჩატარებული სპეცოპერაცია ეხება ფულის გათეთრების შესაძლოს სქემას.

უწყების ინფორმაციით, პროკურატურის საგამოძიებო ნაწილში მიმდინარეობს გამოძიება სისხლის სამართლის საქმეზე, ჯგუფურად განხორციელებული უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობის შემოსავლის მიღება, საქართველოს სისხლის სამართლის კოდექსის 194-ე მუხლის მეორე ნაწილის „ა“ და ამავე მუხლის მესამე ნაწილის ,,გ“ ქვეპუნქტებით გათვალისწინებული დანაშაულის ნიშნებით.

“საქმე ეხება ტრანსნაციონალური ხასიათის, ათეულობით მილიონი სხვადასხვა ვალუტის თანხების შესაძლო გათეთრებას. აღნიშნულ სისხლის სამართლის საქმეზე, გამოძიებისთვის მნიშვნელოვანი დოკუმენტაციის და ელექტრონული ინფორმაციის მატარებელი მოწყობილობების, ასევე დანაშაულებრივი გზით მოპოვებული თანხების მოძიება-ამოღების მიზნით, 2020 წლის 13 ოქტომბერს, თბილისის საქალაქო სასამართლოს მოსამართლის განჩინების საფუძველზე, თბილისში მდებარე რამდენიმე ობიექტში ჩატარდა საგამოძიებო მოქმედება – ჩხრეკა, რა დროსაც გამოძიებისთვის მნიშვნელოვან დოკუმენტაციასთან ერთად ამოღებული იქნა განსაკუთრებით დიდი ოდენობით თანხები”, – აცხადებს პროკურატურა.

უწყებისვე ინფორმაციით, საგამოძიებო მოქმედებების შედეგად ამოღებული ფასეულობების უსაფრთხო ტრანსპორტირების უზრუნველყოფის მიზნით, გამოიყენეს სპეციალური დანიშნულების რაზმის თანამშრომლები.

 

მასალების გადაბეჭდვის წესი