ნეტგაზეთი | მიდით არჩევნებზე და ხმა პატარა პარტიებს მიეცით – მარგველაშვილი მიდით არჩევნებზე და ხმა პატარა პარტიებს მიეცით – მარგველაშვილი – Netgazeti
RU | GE  

მიდით არჩევნებზე და ხმა პატარა პარტიებს მიეცით – მარგველაშვილი

საქართველოს ყოფილი პრეზიდენტი გიორგი მარგველაშვილი მოქალაქეებს მოუწოდებს, ხმა “პატარა” პარტიებს მისცენ. როგორც მარგველაშვილმა “ტვ პირველის” ეთერში თქვა, მნიშვნელოვანია, პარლამენტში აღარ იყოს მხოლოდ ორი ძალა და ამ პარტიებს აქვთ შესაძლებლობა, უკვე საკანონმდებლო ორგანოში გაერთიანების მეშვეობით “მესამე ძალა” შექმნან.

“ჩემი მიზანია, საქართველოს ამომრჩეველმა ხმა მისცეს არა გადამრჩენელს, არამედ თავისი ხელით შექმნას თავის გადარჩენა. ეს ნიშნავს იმას, რომ ერთი ხელისუფალის ხელში არ იყოს მთელი ძალაუფლება. ეს პატარა პოლიტიკური ძალები, რომლებიც ახლა ძლიერდებიან და რომელთაც საშინლად ურტყამენ, ემტერებიან, ეს  არის თქვენი გადარჩენა. ისინი პარლამეტში თქვენი ხმების გულისთვის იბრძოლებენ, რომ არავინ აღარ გაგიბედონ იმის თქმა, რომ სულელები ხართ და ლარი კარგად იქცევა… ამის გარანტი არის ის, რომ საქართველოს პარლამენტში არ იყოს ორი პოლიტიკური ძალა, არამედ უნდა იყოს მესამე დიდი კონგლომერატი, რომელიც იქ [პარლამენტში] გაერთიანდება, თუ დღემდე გაერთიანება ვერ შეძლეს. ისინი უზრუნველყოფენ იმას, რომ შეურაცხყოფა არ მოგაყენონ და თქვენი ყოფა ამ დონემდე არ დაიყვანონ”,-განაცხადა მარგველაშვილმა.

ყოფილი პრეზიდენტი ასევე ამბობს, რომ გამოსავალს ხედავს პოლიტიკაში ახალი ძალების მოსვლაში და საზოგადოებას მოუწოდებს, არჩევნებზე მივიდნენ და ამ “პატარა პარტიებს” მისცენ ხმა:

“მე გამოსავალს ვხედავ არა ამ ხელისუფლებაში ან წინა ხელისუფლებაში, არამედ ქართულ პოლიტიკაში ახალი ძალების მოსვლაში. მოგიწოდებთ, ვისაც ჩემი გჯერათ, მიდით არჩევნებზე და ამ პატარა, ახალ პატიებს მიეცით ხმა.”

 

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.