ნეტგაზეთი | ოლქში, სადაც ჟორჟოლიანი წარადგინეს, დევი ჭანკოტაძე იყო დასახელებული – რა მოხდა? ოლქში, სადაც ჟორჟოლიანი წარადგინეს, დევი ჭანკოტაძე იყო დასახელებული – რა მოხდა? – Netgazeti
RU | GE  

ოლქში, სადაც ჟორჟოლიანი წარადგინეს, დევი ჭანკოტაძე იყო დასახელებული – რა მოხდა?

„ნაციონალურმა მოძრაობამ“/„ძალა ერთობაშიამ“ ცოტა ხნის წინ ნანუკა ჟორჟოლიანი წარადგინა იმ მაჟორიტარულ ოლქში, სადაც საარჩევნო კამპანია უკვე დაწყებული ჰქონდა გადამდგარ გენერალ დევი ჭანკოტაძეს.

საუბარია წყალტუბო-სამტრედია-ვანი-ხონის ოლქზე. ამ ოლქში „ნაციონალურ მოძრაობას“ უკვე დასახელებული ჰყავდა დევი ჭანკოტაძე. მას საარჩევნო კამპანია დაწყებული ჰქონდა, მართავდა შეხვედრებს, მისი გამოსახულებით პლაკატებიც გაკრული იყო.

მისი კანდიდატურის შესახებ ინფორმაცია ყოფილმა შინაგან საქმეთა მინისტრმა ვანო მერაბიშვილმა გამოაქვეყნა ფეისბუკზე 20 აგვისტოს; ცნობა მისი კანდიდატობის შესახებ პარტიის პრესსამსახურმა „ნეტგაზეთს“ დაუდასტურა.

თუმცა 23 სექტემბერს, მაჟორიტარი დეპუტატობის ოფიციალურ წარდგენაზე, დევი ჭანკოტაძე საერთოდ არ დასახელებულა კანდიდატებს შორის. ამ ოლქში კი პარტიამ „მთავარი არხის“ წამყვანი, ნანუკა ჟორჟოლიანი დაასახელა.

„ნეტგაზეთი“ ამ საკითხის გასარკვევად პარტიის ერთ-ერთ ლიდერს, ზაალ უდუმაშვილს დაუკავშირდა.

„გადაწყდა, რომ ბატონი დევი ჩაერთოს მთლიან ეროვნულ კამპანიაში. ანუ არა მხოლოდ კონკრეტულ ერთ ოლქში იყოს, არამედ ყველგან, მთელი საქართველოს მასშტაბით. ამიტომ, გადაწყდა საბოლოოდ, რომ ნანუკა ჟორჟოლიანი დადგეს ოლქში“, – გვითხრა მან.

„ნეტგაზეთის“ კითხვაზე, იქნება თუ არა ის პარტიის პროპორციულ სიაში, ზაალ უდუმაშვილმა გვითხრა: „ამას ვნახავთ, უკვე სია როდესაც გამოქვეყნდება“. კითხვაზე, შეიძლება თუ არა, რომ ის არც სიაში იყოს, გვითხრა: „არც ვადასტურებ, არც უარვყოფ… სია ჯერ არ არსებობს, ამიტომ ვერანაირ ინფორმაციას ვერ მოგაწოდებთ“.

„ეს საერთო შეთანხმებით მოხდა. თუმცა ვიმსჯელეთ. ვინაიდან ბატონი დევი არის გამორჩეული გენერალი და მას აქვს ძალიან დიდი პოტენციალი არა მხოლოდ ერთ კონკრეტულ ოლქში, არამედ მთელი საქართველოს მასშტაბით ძალიან სერიოზული საარჩევნო კამპანია ჩაატაროს, გადავწყვიტეთ, რომ იყოს საერთ ეროვნული კამპანიის მონაწილე“.

„ნეტგაზეთის“ კითხვაზე, უკავშირდება თუ არა ახალი კანდიდატურის წარდგენა იმას, რომ ჭანკოტაძე თავდაპირველად ვანო მერაბიშვილმა დაასახელა კანდიდატად, გვიპასუხა:

„არანაირ კავშირში მაგასთან არ არის. ბატონი დევი იქ იყო ჩასული და ატარებდა წინასაარჩევნო შეხვედრებს. მაგრამ ოფიციალურად დასახელებული არ გვყოლია მაჟორიტარები და გარკვეული კორექტივები შევიდა მაჟორიტარების სიებში“, – გვითხრა მან.

კანდიდატების სრული სია:

ვაშაძე, ჟორჟოლიანი, ზოდელავა და სხვები – „ძალა ერთობაშიას“ მაჟორიტარობის კანდიდატები

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com