ნეტგაზეთი | ონლაინ ლექციის ჩაშლის მცდელობისა და ლექტორების შეურაცხყოფისთვის შსს-ს მივმართეთ – თსუ ონლაინ ლექციის ჩაშლის მცდელობისა და ლექტორების შეურაცხყოფისთვის შსს-ს მივმართეთ – თსუ – Netgazeti
RU | GE  

ონლაინ ლექციის ჩაშლის მცდელობისა და ლექტორების შეურაცხყოფისთვის შსს-ს მივმართეთ – თსუ

თბილისის სახელმწიფო უნივერსიტეტმა ონლაინ ლექციის ჩაშლის მცდელობისა და ლექტორებისთვის შეურაცხყოფის მიყენების რამდენიმე ფაქტთან დაკავშირებით შინაგან საქმეთა სამინისტროს მიმართა. ინფორმაციას ამის შესახებ თსუ ავრცელებს.

უნივერსიტეტის ცნობით, ერთ-ერთი პირის იდენტიფიცირება უკვე მოხერხდა და ის უნივერსიტეტის სტუდენტი აღმოჩნდა.

“მის [სტუდენტის] საკითხზე ფაკულტეტის საბჭო უახლოეს დღეებში შესაბამის გადაწყვეტილებას მიიღებს. თუ სხვა პირებიც სტუდენტები აღმოჩნდებიან, უნივერსიტეტი დამატებით იმსჯელებს მათ საკითხთან დაკავშირებითაც. საკითხის განხილვისას უნივერსიტეტის ადმინისტრაცია “უმაღლესი განათლების შესახებ“ საქართველოს კანონით, უნივერსიტეტის წესდებითა და შიდა სამართლებრივი რეგულაციებით იხელმძღვანელებს”, – წერია თსუ-ს მიერ გავრცელებულ განცხადებაში.

განცხადებაში ასევე აღნიშნულია, რომ შინაგან საქმეთა სამინისტრო პირთა იდენტიფიცირების შემდეგ, თავისი კომპეტენციის ფარგლებში, საქმეს შესაბამის მსვლელობას მისცემს.

რამდენიმე დღის წინ სოციალურ ქსელებში გავრცელდა ვიდეო, სადაც უცნობმა პირებმა, რომლებიც ერთ-ერთ ლექციას დისტანციურად ესწრებოდნენ, ლექციის ჩაშლა ბილწისტყვაობით და სხვადასხვა რეპლიკით სცადეს. როგორც ვიდეოდან ირკვევა, აღნიშნულ ფაქტს ინციდენტში მონაწილე ერთ-ერთი პირი იწერდა. სწორედ ეს ჩანაწერი გავრცელდა სოციალურ ქსელებში.

ნეტგაზეთის მასალების სხვა გამოცემებში გადაბეჭდვის წესი
ავტორი