თბილისის საერთაშორისო დოკუმენტური ფილმების ფესტივალი, CinéDOC-Tbilisi 30 აგვისტოს გაიხსნება ქართველი რეჟისორების, ნინო ორჯონიკიძისა და  ვანო არსენიშვილის ფილმით  “გვირაბი”. 

Covid 19-ის პანდემიის გამო კინოფესტივალის მე-8 გამოშვება მაისის ნაცვლად 30 აგვისტოდან 30 სექტემბრის ჩათვლით ჩატარდება. 

კინოჩვენებები მოეწყობა ღია ცის ქვეშ,  ლისზე Cavea Drive-in კინოთეატრში, ჩვენებების ნაწილი კი- სასტუმრო “სტამბისა” და კავკასიური სახლის ტერიტორიაზე. 

2020 წელს CinéDOC-Tbilisi-ის “სტუმარი ქვეყანა”  ფინეთი იქნება, მაყურებელი ფინურ ფილმებთან ერთად შვეიცარიული ფილმების პროგრამას ნახავს. 

წელს პირველად CinéDOC-Tbilisi-ს ონლაინ კინოჩვენებები ემატება. 23-30 სექტემბერს ფილმების ონლაინ ნახვას მაყურებელი კინოფესტივალის ვებგვერდზე,  cinedoc-tbilisi.com-ზე შეძლებს. 

CinéDOC-Tbilisi სამხრეთ კავკასიაში პირველი საერთაშორისო დოკუმენტური კინოფესტივალია, რომელიც თბილისში 2013 წლიდან ტარდება. ფესტივალი ევროკავშირის პროექტის,  „კრეატიული ევროპის“ (Creative Europe) მხარდაჭერით ხორციელდება.