თბილისის მერიის ცნობით, კომპანია „სისტრას“ კვლევების საფუძველზე, თბილისის სატრანსპორტო ქსელის რეფორმის ფარგლებში შემუშავდა 10 ძირითადი საავტობუსე დერეფანი, სადაც 12-მეტრიანი და 18-მეტრიანი ავტობუსები ივლიან.

ამ დერეფნების შესახებ დეტალები 27 აგვისტოს, თბილისის ავტობუსის სატრანზიტო დერეფნის (TBT ხაზების) პრეზენტაციაზე გააცნო საზოგადოებას თბილისის მერის მოადგილემ, მაია ბითაძემ. დერეფნების ჩამონათვალი ასეთია:

I დერეფანი: ანა პოლიტკოვსკაიას ქუჩა, ვაჟა-ფშაველას გამზირი, ჭავჭავაძის გამზირი, რუსთაველის გამზირი, გორგასლის ქუჩა, ბერი გაბრიელ სალოსის ქუჩა;

II დერეფანი: უნივერსიტეტის ქუჩა, ვაჟა-ფშაველას გამზირი, პეკინის გამზირი, რუსთაველის გამზირი, გორგასლის ქუჩა, მოსკოვის გამზირი;

III დერეფანი: თამარაშვილის ქუჩა, ჭავჭავაძის გამზირი, რუსთაველის გამზირი, ქეთევან დედოფლის გამზირი, მოსკოვის გამზირი;

IV დერეფანი: ჭავჭავაძის გამზირი, თამარ მეფის გამზირი, დადიანის ქუჩა, ხიზანიშვილის ქუჩა;

V დერეფანი: ვაჟა-ფშაველას გამზირი, პეკინის გამზირი, რუსთაველის გამზირი, ქეთევან დედოფლის გამზირი, ბერი გაბრიელ სალოსის გამზირი;

VI დერეფანი: უნივერსიტეტის ქუჩა, რუსთაველის გამზირი, ქეთევან დედოფლის გამზირი, ჯავახეთის ქუჩა, კუპრაძის ქუჩა;

VII დერეფანი: ხიზანიშვილის ქუჩა, გურამიშვილის გამზირი, წერეთლის გამზირი, რუსთაველის გამზირი, გორგასლის ქუჩა, ჯავახეთის ქუჩა;

VIII დერეფანი: დემეტრე თავდადებულის ქუჩა, მირიან მეფის ქუჩა, ლუბლიანას ქუჩა, წერეთლის გამზირი, სადგურის მოედანი;

IX დერეფანი: დემეტრე თავდადებულის ქუჩა, მირიან მეფის ქუჩა, ლუბლიანას ქუჩა, მარშალ გელოვანის გამზირი, ვაჟა-ფშაველას გამზირი, უნივერსიტეტის ქუჩა;

X დერეფანი: ხიზანიშვილის ქუჩა, ლუბლიანას ქუჩა, მარშალ გელოვანის გამზირი, ვაჟა-ფშაველას გამზირი, ქავთარაძის ქუჩა, უნივერსიტეტის ქუჩა;

თბილისის სატრანსპორტო დერეფნები. წყარო: თბილისის მერია

მაია ბითაძემ თქვა, რომ ახალი სქემით, ავტობუსის ლოდინის დრო საშუალოდ 7-15 წუთი იქნება, 12 და 18-მეტრიანი ავტობუსებისთვის დიდ დერეფნებზე კი, მაქსიმუმ 10-15 წუთი. ამ დერეფნების შემადგენელ გამზირებისა და ქუჩების უმრავლესობაზე ავტობუსების ზოლების („ბასლეინების“) დახაზვა იგეგმება.

თბილისის მერის მოადგილის თანახმად, პროექტში გათვალისწინებულია გაჩერებამდე ფეხით მისასვლელი ოპტიმალური დროც: ძირითად დერეფნებში -400- 450 მეტრი, საქალაქო ხაზებთან -300-350 მეტრი, ხოლო საუბნო ხაზებთან- 200-250 მეტრი.

„ნეტგაზეთის“ ინფორმაციით, ზოგიერთ შემთხვევაში „ბასლეინები“ მოეწყობა მანქანების მოძრაობის საწინააღმდეგო მიმართულებით, როგორც ჭავჭავაძის გამზირზე, თუმცა ჯერჯერობით არ დასახელებულა, თუ რომელ გამზირზე/დერეფანზე იქნება ასეთი მოწყობა.

როგორც „ნეტგაზეთი“ აგვისტოს დასაწყისში წერდა, კომპანია „სისტრას“ პროექტის ფარგლებში განსაზღვრული გეგმით, ქალაქში იქმნება ძლიერი იერარქიული სატრანსპორტო ქსელი, რომლის ფარგლებშიც:

• გამოიყოფა თბილისის 10 ძირითადი საავტობუსე დერეფანი, იგივე TBT ხაზი — 10 მარშრუტი; ათივე მარშრუტზე იქნება გამოყოფილი „ბასლეინი“, — ზოგ შემთხვევაში შუაში, — სადაც დიდი ზომის, 18-მეტრიანი ავტობუსები ივლიან ყოველ 12-15 წუთში და ექნება შესაძლებლობა, გადაიყვანოს 150 ადამიანი; ყველა მათგანს დაემატება ველობილიკი; დღეს გახდა ცნობილი, თუ რომელ გამზირებს/ქუჩებს მოიცავს ეს 10 დერეფანი;
• ამას გარდა, გამოიყოფა ქალაქის ხაზები — 44 მარშრუტი; ქალაქის ხაზები დაემატება TBT ქსელს და მოემსახურება ყველა მნიშვნელოვან გრძელმანძილიან მარშრუტს ქალაქის ორ რაიონს შორის, რომელსაც არ ითვალისწინებს TBT ხაზი; აქ ივლიან 8, 10, 12-მეტრიანი ავტობუსები;
• გამოიყოფა საუბნო ხაზები — 185 მარშრუტი; საუბნო ხაზები შეასრულებს დამხმარე ფუნქციას მთლიან საავტობუსე ქსელში და ამ მარშრუტებზე — მოკლე მანძილებზე — იმოძრავებენ მიკროავტობუსები და მინიავტობუსები (მცირე ზომის, 8-მეტრიანი, ავტობუსები);

მაია ბითაძის თანახმადვე, 2020 წლის შემოდგომაზე უკვე დასრულდება ყვითელი, „ბოგდანის“ ფირმის ავტობუსების ჩანაცვლების პროცესი და ამ დროიდან „ბოგდანები“ თბილისიდან სრულად გაქრებიან;

სრულად ამ საკითხზე გირჩევთ:

სატრანსპორტო ქსელის ცვლილება ვაკეში – „ეს მხოლოდ დასაწყისია“