ნეტგაზეთი | II კვარტალში ტელევიზიების სარეკლამო შემოსავალი შემცირდა II კვარტალში ტელევიზიების სარეკლამო შემოსავალი შემცირდა – Netgazeti
RU | GE  

II კვარტალში ტელევიზიების სარეკლამო შემოსავალი შემცირდა

კომუნიკაციების კომისიამ 2020 წლის მეორე კვარტალში სატელევიზიო სარეკლამო შემოსავლები გამოაქვეყნა. კომისიის ინფორმაციის თანახმად, 2020 წლის მეორე კვარტალში ტელემაუწყებლების სარეკლამო შემოსავლებმა 12.2 მილიონი ლარი შეადგინა, რაც 2019 წლის მეორე კვარტალის შემოსავლებთან შედარებით — 20 მილიონი ლარი, შემცირებულია.

სარეკლამო შემოსავლების მიხედვით, 2020 წლის მეორე კვარტალში ყველაზე მეტი თანხა “იმედმა”, “რუსთავი 2-მა” და “მთავარმა არხმა” მიიღეს.

მათივე განცხადებით, 2020 წლის პირველ კვარტალში სატელევიზიო სარეკლამო შემოსავლებში დაფიქსირებული ზრდის მიუხედავად, COVID-19-ის გავრცელება სარეკლამო ბაზარზე უარყოფითად აისახა.

სატელევიზიო სარეკლამო შემოსავლები რეკლამას, სპონსორობას, პროდუქტის განთავსებას, განცხადებებს და ტელეშოპინგს მოიცავს.

2020 წლის მეორე კვარტალში სატელევიზიო სარეკლამო შემოსავლები მაუწყებლების ჭრილში ასე გადანაწილდა:

  • ტელეიმედი – 5.4 მილიონი ლარი
  • სამაუწყებლო კომპანია რუსთავი 2 – 2.1 მილიონი ლარი
  • მთავარი არხი –  1.3 მილიონი ლარი
  • ტელეკომპანია პირველი –  0.8 მილიონი ლარი
  • ჯი-დი-ეს თივი – 0.5 მილიონი ლარი
  • პოსტვ – 0.4 მილიონი ლარი
  • ფორმულა – 0.3 მილიონი ლარი
  • რ.ბ.ჯ. –  0.2 მილიონი ლარი
  • სეტანტა ჯორჯია – 0.1 მილიონი ლარი
  • სტუდია მაესტრო – 0.1 მილიონი ლარი
  • სხვა –  0.9 მილიონი ლარი

“კომუნიკაციების კომისიის პროგნოზით, მიუხედავად პანდემიით გამოწვეული  ნეგატიური შედეგებისა, თუ ქვეყანაში COVID-19-ის ახალი ტალღა არ იქნება, კომერციული სექტორის სარეკლამო აქტივობები კლებას დააბალანესებს და წლის ჭრილში, 2020  წელს სარეკლამო ბაზარზე კლების მაღალი მაჩვენებელი  არ დაფიქსირდება”, — აცხადებენ კომისიაში.

ნეტგაზეთის მასალების სხვა გამოცემებში გადაბეჭდვის წესი
ავტორი