პროკურატურის განცხადებით, ამ ეტაპზე არსებული მტკიცებულებებით, გიორგი შაქარაშვილის უშუალოდ განზრახ მკვლელობაში “მერსედესის” მარკის ავტომობილის მგზავრების მონაწილეობა გამოირიცხება. ამის შესახებ დღეს, 11 აგვისტოს, პროკურორმა ამირან გულუაშვილმა განაცხადა.

მისი თქმით, მცხეთაში მომხდარ კონფლიქტთან დაკავშირებით საბურთალოდან და ნაძალადევიდან სულ 8 მანქანა დაიძრა, თუმცა, გიორგი შაქარაშვილის განზრახ მკვლელობის დროს, “ტოიოტა ქამრის” გარდა, ყველა სხვა მანქანა სხვადასხვა ლოკაციაზე იყო და მათი მგზავრები ამ დანაშაულის ჩადენაში მონაწილეობას ფიზიკურად ვერ მიიღებდნენ.

“რაც შეეხება მერსედესის მარკის ავტომანქანის მონაწილეობას, აქ არ არის საუბარი კონკრეტულად მხოლოდ ერთ ავტომანქანაზე. სულ, მერსედესის და ტოიოტა ქამრის გამოკლებით, კიდევ 6 მანქანა დაიძრა საბურთალოდან და ნაძალადევიდან, აი, ამ კონფლიქტთან დაკავშირებით. გამოძიების მიერ შესწავლილ იქნა რვავე მანქანის მარშრუტი, გადაადგილება, მობილური ოპერატორების მეშვეობით განხორციელებული კომუნიკაცია და ამ ეტაპზე არსებული სურათის გათვალისწინებით, ცალსახად გამოირიცხება რომელიმე მათგანის მონაწილეობა უშუალოდ გიორგი შაქარაშვილის განზრახ მკვლელობასთან დაკავშირებით. მერსედესის მგაზვრების მხრიდან განხორციელებული ძალადობა, მათ შორის ხელკეტის გამოყენებით, განხორციელდა გიორგი შაქარაშვილის თანმხლები პირის მიმართ, ეს სამართლებლივად შეფასებულია და ამაზე კონკრეტული პირები სისხლის სამართლებრივ პასუხისგებაში არიან მიცემულები. ამ ეტაპზე არსებული სურათით, რომელიც შექმნილია მტკიცებულებების საფუძველზე, სხვა რომელიმე ავტომანქანა ან პირი შემთხვევის ადგილის სიახლოვეს განზრახ მკვლელობის ჩადენის დროს არ იმყოფებოდა, გარდა ტოიოტა ქამრისა და მისი მგზავრებისა”, — განაცხადა ამირან გულუაშვილმა.

• დღეს, 11 აგვისტოს საქართველოს მთავარმა პროკურატურამ გააკეთა განცხადება, რომ ახალგაზრდა ფეხბურთელის მკვლელობის საქმეზე 5 პირს ბრალი განზრახ მკვლელობის მუხლით დაუმძიმდა.
• 19 წლის ფეხბურთელი გიორგი შაქარაშვილი 4-დღიანი ძიების შემდეგ, 22 ივნისს მდინარე არაგვში გარდაცვლილი იპოვეს. პროკურატურის მიერ გავრცელებული განცხადების მიხედვით, შაქარაშვილის დაკარგვას წინ უძღოდა ორ ჯგუფს შორის დაპირისპირება, რომლის თავიდან ასარიდებლადაც შაქარაშვილი მდინარის მიმართულებით გაიქცა, რა დროსაც მისი კვალი დაიკარგა.
• ამ დროისათვის 18 ივნისს მომხდარი ჩხუბის ეპიზოდზე 17 პირია დაკავებული. ყველა მათგანს წინასწარი პატიმრობა აქვს შეფარდებული. ბრალდებულთა შორის არიან არასრულწლოვნებიც.
• პროკურატურამ 10 ივლისს გამოქვეყნა ექსპერტიზის დასკვნა, რომლის მიხედვითაც, შაქარაშვილის სიკვდილი წყალში დახრჩობამ გამოიწვია, მაგრამ მას სხეულზე გარდაცვალებამდე მიყენებული დაზიანებები აღენიშნებოდა. გარდა ამისა, გამოძიებას დაემატა ახალი მუხლი – დამამძიმებელ გარემოებებში ჯგუფურად განხორციელებული განზრახ მკვლელობა.
• შაქარაშვილის ოჯახი “ტოიოტა ქამრის” ყველა მგზავრის, მთლიანობაში, 6 ადამიანისთვის ითხოვდა მკვლელობის მუხლით ბრალის წარდგენას. ეს უკანასკნელები ამ ბრალდებას უარყოფენ.