ნეტგაზეთი | ამ შაბათ-კვირას ბათუმში ხომ არ მოდიხარ? | ყველა საჭირო ინფორმაცია ერთად ამ შაბათ-კვირას ბათუმში ხომ არ მოდიხარ? | ყველა საჭირო ინფორმაცია ერთად – Netgazeti
RU | GE  

ამ შაბათ-კვირას ბათუმში ხომ არ მოდიხარ? | ყველა საჭირო ინფორმაცია ერთად

დასაწყისშივე გეტყვით, რომ ეს სტატია 8-9 აგვისტოს ბათუმში გასატარებელი შაბათ-კვირის გეგმების დალაგებაში დაგეხმარებათ, იქნება თქვენი გიდი წვიმასა თუ მზეში და მოდით, ამინდით დავიწყოთ:

8-9 აგვისტოს ბათუმში უმეტესად უნალექო ამინდი იქნება. წყარო: meteo.gov.ge

დილა ბათუმში

კვირის ბოლო დღეებში დილა ბათუმში ზანტად იწყება. თუმცა დილაადრიან ნახავთ მხარზე პირსახოცგადაკიდებულ ადამიანებს, რომლებიც სანაპიროსკენ საცურაოდ მიემართებიან. ბათუმში ზღვამდე თუ ზღვის შემდეგ ყავის დალევა მაგიური რიტუალია, რომელიც ერთნაირად გემრიელად სრულდება, როგორც საკუთარ სამზარეულოში, ისე სანაპიროზე მდებარე კაფეებში. ბათუმის შემოსასვლელში, პორტისა და ნავსადგურის მიმდებარედ მარტივად იპოვით თქვენი გემოვნების შესაბამის, ღია თუ დახურულ კაფეს, სადაც ბათუმურ, ნალექიან ყავას ქვიშაზე მოგიხარშავენ.

ფოტო “ბათუმელები”

სანამ აჭარულ ხაჭაპურს შეუკვეთდეთ…

სანამ მზე მთელი ძალით გაათბობს და გაანათებს ქალაქს, ყავის სმის შემდეგ, გირჩევთ, სანაპიროდან ჭავჭავაძის ქუჩით დაუყვეთ ბათუმის არქეოლოგიურ მუზეუმამდე და იხილოთ არაჩვეულებრივი კოლექციები, რომელთა უმეტესობაც აჭარის ტერიტორიაზე ადგილობრივი არქეოლოგების მიერაა აღმოჩენილი, მათ შორის ოქროს ფონდი, მდიდარი ულამაზესი ნაკეთობებით, რომელიც თვალწინ გაგიცოცხლებთ, მაგალითად, როგორ იმკობდნენ თავს კოლხი ასულები.

ოქროს ყელსაბამი ჩიტისა და ჯიხვის გამოსახულებიანი საკიდებით, ძვ.წ. V ს.
აღმოჩენის ადგილი: ქობულეთი, ფიჭვნარის ძვ.წ. V ს ბერძნული ნეკროპოლისი.
წყარო: ბათუმის არქეოლოგიური მუზეუმი

მუზეუმიდან გამოსულებს სადილამდე კიდევ ერთ გამოწვევას გთავაზობთ: 12 სიმბოლური ადგილი ბათუმში საუკეთესო ფოტოების გადასაღებად. თუ ყველას შემოვლას ვერ მოასწრებთ, ბათუმელი ძაღლის, კუპატას სტენსილთან მაინც არ გამოგრჩეთ სელფი, შეიძლება გაგიმართლოთ და თავად კუპატასაც გადააწყდეთ თავისი პორტრეტის სიახლოვეს.

აჭარული ხაჭაპური და სხვები

დარწმუნებულები ვართ, რომ ბათუმში ვიზიტი არავითარ შემთხვევაში არ ჩაივლის აჭარული ხაჭაპურის გარეშე, და ასეც უნდა იყოს. ალბათ, უცნაური არცაა, ქალაქის ყველა რესტორანი და კაფე ერთმანეთს რომ ეჯიბრება, ვის გამოსდის ყველაზე კარგად ამ არამატერიალური კულტურული მემკვიდრეობის ძეგლის “გამოქანდაკება”, თუმცა არჩევანი თქვენთვის მოგვინდვია.

აჭარული ხაჭაპური ჰო, მაგრამ სინორი ან ყურუთი გაგისინჯავთ? იახნი? თუ ამ სახელებს თქვენს წარმოსახვაში არცერთი გემოს რეცეპტორი არ გამოეხმაურა, მაშინ დროა აჭარული კულინარიის სიმაღლეებზე, უფრო ზედა საფეხურისკენ წახვიდეთ. ჩვენის მხრივ გირჩევთ იმ ტრადიციულ კერძებს, რომელიც უნდა დააგემოვნოთ ბათუმში ვიზიტისას.

საიდან ვნახავთ ლამაზ დაისებს?

რა თქმა უნდა, სანაპიროზე. იქნება ეს უშუალოდ ნაპირი და შემაღლებული შენობის აივნები და ფანჯრები. მზიან დღეს უფერადესი დაისი მოჰყვება. აუცილებლად ღირს ამ დროს მარტო თუ საყვარელ ადამიანებთან ერთად ჩუმად ჯდომა და იმაზე ფიქრი, მზე მართლა ზღვაში ჩადის თუ დედამიწა ტრიალებს მის ირგვლივ.

მზის ჩასვლის შემდეგ

მზეს ყველა რომ გამოეთხოვება, ქალაქი უამრავი ფერადი შუქით ინთება. თუ გინდათ სრული მოხაზულობა იხილოთ, ნავსადგურს ეწვიეთ. მზის ჩასვლის შემდეგ ნავსადგურში ზღვის ქარს მთის ქარი ცვლის, ადამიანებიც დასასვენებლად უფრო მეტად სანაპირო ზოლს ირჩევენ. ნავსადგურში უამრავი იახტა და ნავია, რომლით გასეირნებაც საოცარ შესაძლებლობას მოგცემთ, ჩახედოთ ბათუმს თვალებში და ყველა სენისგან განიკურნოთ.

ღონისძიებები – როგორ გავერთოთ?

ვინც გართობას ან კულტურულ დასვენებას გეგმავთ, გაგიმართლათ, მთელი შაბათ-კვირა ქალაქში უამრავი ღონისძიებაა დაგეგმილი. მაშ მივყვეთ:

ბიაფფიადა  ბათუმის კინოფესტივალის პროექტია, რომლის ფარგლებშიც მთელი აგვისტოს მანძილზე პარასკევს, შაბათსა დ აკვირას 21 საათზე უფასო კინოჩვენებებს შემოგთავაზებთ.

ამ შაბათ-კვირას ემთხვევა საქართველოს მერვე ჩემპიონატი ინტელექტუალურ თამაშში “ბრეინრინგი”. თუ მეგობრებთან ერთად ისვენებთ და საკუთარი ინტელექტუალური შესაძლებლობების გამოცდა გინდათ, გაქვთ შანსი ითამაშოთ “რა?სად?როდის?” , ბრეინრინგი და ჯეპარდი. ტურნირი ორ დღეს გასტანს და გამოავლენს ქვეყნის ჩემპიონებს.

მუსიკალურ ღონისძიებებს რაც შეეხება, ელექტრონული მუსიკის მოყვარულებისთვის 8 და 9 აგვისტოს სანაპიროს კლუბებში ისეთი მუსიკოსები დაუკრავენ, როგორებიც არიან SUMO, Hatsvali / HTSVL , Kura და სხვები.

9 აგვისტოს ასევე დიდი ვარსკვლავთცვენაა მოსალოდნელი. ბათუმში მყოფი მსმენელისთვის დაუკრავენ და იმღერებენ Bedford Falls, Killages, ერეკლე დეისაძე ბენდით და ანა გოგიაშვილი.

ერეკლე დეისაძე /kibe

გზადაგზა შეგიძლიათ ბარებიც შემოიაროთ და გაიგოთ, სად გიმასპინძლებენ ღამით ბათუმში.

დაუვიწყარ დასვენებას გისურვებთ!

ნეტგაზეთის მასალების სხვა გამოცემებში გადაბეჭდვის წესი
ავტორი