ნეტგაზეთი | “ქურდული სამყაროს” წევრობასა და გამოძალვაზე პროკურატურამ ბრალი ორ პირს წარუდგინა “ქურდული სამყაროს” წევრობასა და გამოძალვაზე პროკურატურამ ბრალი ორ პირს წარუდგინა – Netgazeti
RU | GE  

“ქურდული სამყაროს” წევრობასა და გამოძალვაზე პროკურატურამ ბრალი ორ პირს წარუდგინა

საქართველოს პროკურატურის განცხადებით, “ქურდული სამყაროს” წევრობასა და გამოძალვაზე ბრალი ორ პირს დაუსწრებლად წარუდგინა.

უწყებაში ამბობენ, რომ “კანონიერი ქურდობისა” და ჯგუფურად, დიდი ოდენობით ქონების მიღების მიზნით, გამოძალვის მუხლებით ბრალი წარუდგინა თ.გ-ს, ხოლო „ქურდული სამყაროს“ წევრობისა და ჯგუფურად, დიდი ოდენობით ქონების მიღების მიზნით, გამოძალვის მუხლით- გ.გ.-ს:

“გამოძიების დადგინა, თურქეთში მყოფი “კანონიერ ქურდის” – თ.გ-ს მითითებით და ხელმძღვანელობით, “ქურდული სამყაროს” წევრი გ.გ. თურქეთიდან დაუკავშირდა საქართველოში მყოფ მამას, ასევე „ქურდული სამყაროს“ წევრს – ა.გ-ს და საქართველოში, ბიზნესსაქმიანობით დაკავებული მ.ყ-სთვის ოჯახის წევრების გატაცების მუქარით, თანხის გამოძალვის ორგანიზება მოახდინეს.

მიზნის მისაღწევად, 2020 წლის 1 ივნისს, დაზარალებულ მ.ყ-ს „კანონიერ ქურდის“ – თ.გ-ს დავალებით, უცნობი პირი დაუკავშირდა და ჩეჩნური კრიმინალური დაჯგუფების სახელით, შვილის გატაცების ორგანიზებისგან თავის შეკავების სანაცვლოდ 60 000 აშშ დოლარი მოსთხოვა. მეორე დღეს კი დაზარალებულს „ქურდული სამყაროს“ წევრი ა.კ. დაუკავშირდა და წარმოშობილი პრობლემის მოგვარებას „ქურდული სამყაროს“ მიერ დადგენილი წესებისა და „კანონიერი ქურდის“ თ.გ-ს დახმარებით დაჰპირდა.

აღნიშნულის შემდეგ დაზარალებულს თურქეთის რესპუბლიკიდან რამდენჯერმე დაუკავშირდა „კანონიერი ქურდი“ – თ.გ. და „ქურდული სამყაროს“ წევრი – გ.გ., რომლებიც თავიანთი კრიმინალური ავტორიტეტისა და „ქურდული სამყაროს“ იერარქიაში მაღალი სტატუსის ხაზგასმით ცდილობდნენ მ.ყ-ს დაშინებას, რათა მას ა.კ-სთვის თანხა გადაეცა. 2020 წლის 12 ივნისს დაზარალებულმა მ.ყ-მ დაშინებითა და მუქარით მოთხოვნილი თანხის ნაწილი, 10 000 აშშ დოლარი ა.კ-ს გადასცა, რის შემდგომ სამართალდამცავებმა იგი დააკავეს”, – აცხადებენ პროკურატურაში.

უწყების განცხადებით, 2020 წლის 14 ივნისს ა.კ-ს წარედგინა ბრალდება და იმავე დღეს აღკვეთის ღონისძიების სახით პატიმრობა შეეფარდა.

2020 წლის 5 აგვისტოს კი, უწყების ცნობით, თ.გ-ს და გ.გ-ს აღკვეთის ღონისძიების სახით პატიმრობა შეეფარდათ და მათ მიმართ გამოცხადდა ძებნა.

საქმეზე გამოძიება საქართველოს სისხლის სამართლის კოდექსის 2231-ე მუხლის პირველი და მეორე ნაწილებით და 181-ე მუხლის მე-2 ნაწილის „ა“ და „გ“ ქვეპუნქტებით მიმდინარეობს, რაც სასჯელის სახედ და ზომად ცხრიდან თხუთმეტ წლამდე თავისუფლების აღკვეთას ითვალისწინებს.

ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ბოგვერაძე არის "ნეტგაზეთის" რეპორტიორი 2016 წლიდან.