ნეტგაზეთი | ნარკოტიკების რეალიზაციის ბრალდებით ფონიჭალაში 9 პირი დააკავეს ნარკოტიკების რეალიზაციის ბრალდებით ფონიჭალაში 9 პირი დააკავეს – Netgazeti
RU | GE  

ნარკოტიკების რეალიზაციის ბრალდებით ფონიჭალაში 9 პირი დააკავეს

შინაგან საქმეთა სამინისტროს ინფორმაციით, ნარკოტიკების რეალიზაციის ბრალდებით ფონიჭალაში 9 პირი დააკავეს.

შსს-ს ცნობითვე, ბრალდებულები მოსამართლის განჩინების საფუძველზე დააკავეს. საქმეზე გამოძიება სსკ-ს 260-ე მუხლის პირველი ნაწილით, მე-3 ნაწილის „ა“ ქვეპუნქტით, მე-4 ნაწილით, მე-5 ნაწილის „ა“ და „ბ“ ქვეპუნქტებით და მე-6 ნაწილის „ა“ ქვეპუნქტით, ასევე 273-ე მუხლით მიმდინარეობს, რაც წინასწარი შეთანხმებით ჯგუფის მიერ განსაკუთრებით დიდი ოდენობით ნარკოტიკული საშუალების უკანონო შეძენა-შენახვა-გასაღებას და ნარკოტიკული საშუალების ექიმის დანიშნულების გარეშე მოხმარებას გულისხმობს.

“გამოძიებით დგინდება, რომ ბრალდებულები სისტემატიურად ყიდდნენ ნარკოტიკულ საშუალებებს. სამართალდამცველებმა, მოსამართლის განჩინების საფუძველზე, რამდენჯერმე განახორციელეს ბრალდებულებისგან ნარკოტიკული საშუალება „ჰეროინის“ საკონტროლო შესყიდვა და აღნიშნული შესყიდვების ფარული აუდიო-ვიდეოჩაწერა.

პოლიციამ, დაკავებულების პირადი და საცხოვრებელი სახლების ჩხრეკისას, 94 შეკვრა „ჰეროინი“, ასევე, ნარკოტიკული საშუალება “მეტადონი”, 16 000 ლარამდე თანხა და მათი კუთვნილი მობილური ტელეფონები ნივთმტკიცებად ამოიღო”,-აცხადებენ შსს-ში. დამტკიცების შემთხვევაში, დანაშაული 8-დან 20 წლამდე ან უვადო თავისუფლების აღკვეთას ითვალისწინებს.
ნეტგაზეთის მასალების სხვა გამოცემებში გადაბეჭდვის წესი
ავტორი
მარიამ ვარადაშვილი არის ნეტგაზეთის რეპორტიორი 2017 წლის სექტემბრიდან.